आशाताई बच्छाव
रिमझिम पावसात दुमदुमला विठ्ठल नामाचा गजर
शत्रुघ्न काकडे पाटील:-ब्युरो चिफ परभणी (युवा मराठा न्युज नेटवर्क)
(परभणी) जिंतूर:- एकादशीच्या पूर्वसंध्येलाच जिंतूर शहरातील बालक मंदिर पूर्व माध्यमिक शाळेच्या विद्यार्थ्यांनी विठ्ठल रुक्मिणीचे पोशाख परिधान करून टाळ व मृदंगाच्या गजरात विठ्ठलाची दिंडी शहरातून काढली. यामुळे शहरात भक्तिमय वातावरण पाहण्यास मिळाले.
विठ्ठल आणि रुक्मिणीचा वेश, वारकऱ्यांचा गणवेश परिधान करून हातात टाळ आणि मृदंग, नऊवारी पातळ परिधान करून डोक्यावर तुळशीचे वृंदावन घेऊन निघालेल्या मुली आणि भजनांचा गजर करत शहरातील मुख्य रस्त्यावरून शाळेच्या विद्यार्थ्यांनी दिंडी काढली. विठ्ठल माझा, माझा, माझा असे भक्तिमय अभंग सादर केले. “सांग, सांग रुक्मिणी, सांग तुझ्या विठ्ठलाला. तुझ्या विठ्ठलाने माझा नामा वेडा केला”. यासारखी भजने शाळेतील विद्यार्थ्यांनी गायली. विठ्ठल विठ्ठल – जनाबाईच्या गवाऱ्या बोलू लागल्या, कबीर अन् नामदेवाच्या माना डोलू लागल्या.
यासारखे अभंग रस्त्याने विद्यार्थ्यांनी सादर केले. थांबा जरा येऊ द्या मला, परसी भरायची आणि पंढरीची वारी मला करायची यासारखे अभंग सादर करत दिंडी शहराच्या मुख्य रस्त्यावरून शिवाजी चौक, येलदरी रोड पासून विठ्ठल मंदिरापर्यंत गेली. भरपावसात विद्यार्थ्यांच्या भक्तीचा नाद दुमदुमत होता. शाळेतील शिक्षकांनीही वारकऱ्यांचे गण वेश परिधान करून विद्यार्थ्यांच्या आनंदात अधिकच भर घातली. शाळेचे सचिव रमन तोष्णीवाल, मुख्याध्यापक गजानन तिखे यांच्या मार्गदर्शनाखाली विद्यार्थ्यांनी दिंडीत सहभाग घेतला.काही ठिकाणी विद्यार्थ्यांना प्रोत्साहित करण्यासाठी परिसरातील नागरिकांनी फुलांचा वर्षाव केला. तर याच दिंडीत साठ वर्षाच्या एका आजीबाईने अभंगाला दात देत दिंडीत सहभाग घेतला. सुभाष धानोरकर यांनी अभंग गाऊन विद्यार्थ्यांना प्रोत्साहित केले. रामप्रसाद राखे, ज्ञानबा तडस, संजय साबळे, वसंत राठोड, प्रसाद घुगे, शिवाजी काकडे, विनोद पाचविल्ले, सुभाष चोपडे, परसराम घांदारे, गणेश रुघे, जी. एस. अंभोरे, अनिता मनोरवार, पद्मा जाधव, विजया पतंगे, बसवेश्वर स्वामी, संध्या पटोदे आदी शिक्षकांनी सहभाग घेतला होता.