आशाताई बच्छाव
महापालिकेतील TDR घोटाळ्याची चौकशी होणार ? थेट ED कडे तक्रार केल्याने एकच चर्चा
पुणे ब्युरो चिप उमेश पाटील
पिंपरी-चिंचवड महापालिकेत शेकडो कोटी रुपयांचा टीडीआर घोटाळा झाल्याचा आरोप विधानसभेत विरोधी पक्षनेते विजय वडेट्टीवार यांनी नुकताच (ता.१२) केला. त्यात उद्योगनगरीतील महायुतीच्या तिन्ही आमदारांसह महापालिका आयुक्त तथा प्रशासक शेखरसिंह हे ही त्यात सामील असल्याचा हल्लाबोल महाविकास आघाडीच्या स्थानिक नेत्यांनी पत्रकापरिषद घेऊन नंतर (ता.१५) पिंपरीत केला. तर, आज (ता.१८) संभाजी ब्रिगेडने त्याची थेट ईडीकडे तक्रार करीत चौकशीची मागणी केली.
वाकडमधील आरक्षित भूखंड खासगी विकासकाला विकसित करण्यासाठी देण्यात शासकीय नियमांची पायमल्ली करत यामध्ये दीड हजार कोटी रुपयांचा टीडीआर घोटाळा करण्यात आल्याचा आरोप संभाजी ब्रिगेडने केला आहे. या घोटाळ्यात पिंपरी महापालिकेच्या नगररचना विभागाचे उपसंचालक प्रसाद गायकवाड यांची मुख्य भूमिका असल्याने त्यांच्यावर कडक कारवाई करण्याची मागणी ईडीकडे केलेल्या तक्रारीत ब्रिगेडचे शहराध्यक्ष सतीश काळे यांनी केली आहे.