शिवाच्या नामस्मरणाने काम, क्रोधादी विकार नाहीसे होऊन भक्तास परम सुखाची प्राप्ती होते-

आशाताई बच्छाव

शिवाच्या नामस्मरणाने काम, क्रोधादी विकार नाहीसे होऊन भक्तास परम सुखाची प्राप्ती होते-

महामंडलेश्वर शिवगिरीजी महाराज

भाऊसाहेब नगर येथील शिवमहापुराण कथेत महाराजांचे प्रतिपादन –

दैनिक युवा मराठा
निफाड (रामभाऊ आवारे)

भाऊसाहेब नगर ता. निफाड येथील राष्ट्रसंत जनार्दन स्वामी आश्रमात भव्य जपानूष्ठान सोहळ्यास मोठ्या भक्ती भावाने प्रारंभ झाला असून हा सोहळा रविवार दिनांक २८ मे पर्यंत चालणार आहे. या सोहळ्या अंतर्गत लघुरुद्रयाग (यज्ञ) ग्रंथराज ज्ञानेश्वरी पारायण व शिवमहापुराण कथेचे आयोजन करण्यात आले आहे. दररोज सकाळी ८ ते ११ या वेळेत ह.भ.प. प्रशांत महाराज रायते यांच्या मार्गदर्शनाखाली ग्रंथराज ज्ञानेश्वरी पारायण सायंकाळी ६ ते ७ या वेळेत नित्य नियम विधी, आरती, हरिपाठ व रात्री २५ मे पर्यंत रात्री ८ ते १० या वेळेत राष्ट्रसंत जनार्दन स्वामी महाराज यांचे कृपापात्र शिष्य महामंडलेश्वर स्वामी शिवगिरीजी महाराज शिवमहापुराण कथेचे प्रसादिक व रसाळ वाणीत विविध दृष्टांत, दाखले देऊन निरूपण करीत आहेत. शिवाच्या नित्य नामस्मरणाने काम क्रोधादी विकार नाहीसे होऊन भक्तास परम सुखाची प्राप्ती होते. शिवशंकर भगवान भोळे दैवत असून भक्ताने, साधकाने श्रद्धायुक्त अंतकरणाने ओम नमः शिवाय मंत्राचा जप केल्यास भक्ताची कळीकाळाची भीती नाहीशी होऊन धर्म, अर्थ, काम, मोक्ष या पुरुषार्थांची प्राप्ती होते. अशा आशयाचे प्रतिपादन महामंडलेश्वर शिवगिरी महाराजांनी कथेच्या प्रथम दिनी केले. दिवसेंदिवस कथा श्रावणासाठी भाविकांची गर्दी वाढत आहे. तसेच ख्यातनाम गायक ईश्वर कुशारे, त्रंबक मेदने हे गायन साथ करीत असून, विठ्ठल गाडे हे तबल्याची तर मंगेश राजगुरू ऑर्गनची साथ करीत आहेत, तर दीपक बकरे ढोलकची साथ करीत आहेत. शुक्रवार दिनांक २६ मे रोजी रात्री ९ ते ११ या वेळेत ख्यातनाम कीर्तनकार ह.भ.प. समाधान महाराज शर्मा यांचे कीर्तन होणार आहे.
शनिवार दिनांक २७ मे रोजी रात्री ९ ते ११ या वेळेत परमपूज्य स्वामी माधव गिरीजी महाराज यांचे प्रवचन होणार आहे. रविवार दिनांक २८ मे रोजी सकाळी १०.०० वाजता जपानुष्ठान सांगता यज्ञ पूर्णाहुती होऊन उपस्थित साधुसंतांची प्रवचने होऊन महाप्रसादाने सोहळ्याची सांगता होणार आहे. भाविकांनी जपानुष्ठान, शिवमहापुराण कथा, कीर्तन, प्रवचन ज्ञानेश्वरी पारायण आधी धार्मिक कार्यक्रमांचा लाभ घेण्याचे आवाहन महामंडलेश्वर स्वामी शिवगिरीजी महाराज व जनार्दन स्वामी भक्त मंडळाने केली आहे.