आशाताई बच्छाव
‘आरे’ विरोधात उद्या होणार आंदोलन – प्रकाश आंबेडकरांची घोषणा मुंबई,(सुनील धावडे ब्युरो टिम युवा मराठा न्युज नेटवर्क)
अहमदाबाद-मुंबई मेट्रोचे कारशेड महाविकास आघाडी सरकारने आरे येथून हलवून कांजुरमार्गला हलवले होते. मात्र शिंदे सरकारने गोरेगावमधील आरे जंगलात मेट्रो कारशेड बांधण्याचा घाट घातला आहे. त्याविरोधात आता मुंबई वंचित बहुजन आघाडीच्या वतीने रविवारी आंदोलन करण्यात येणार आहे.
सत्तांतरानंतर शिंदे-फडणवीस सरकारने ठाकरे सरकारचा मुंबईतील मेट्रो ३ कारशेडबाबतचा निर्णय रद्द करत कारशेड कांजुरमार्गहून पुन्हा आरे कॉलनीच्या परिसरातच करण्याचा निर्णय घेतला. शिवसेनेनेसह आरेमधील स्थानिक रहिवाशांनीही याविरोधात विरोधाचा मार्ग निवडला आहे. आता वंचित बहुजन आघाडीनेही आंदोलनाची घोषणा केली आहे. वंचितचे प्रमुख प्रकाश आंबेडकर यांनी उद्या रविवारी (७ ऑगस्ट) रोजी आरे बचावासाठी आंदोलन करणार असल्याची घोषणा केली आहे.
आरेचं जंगल मुंबईच्या ऑक्सिजनचा मोठा स्रोत आहे. ऑक्सिजन निर्माण करणारं हे जंगल मुंबईकरांचे जीवन आहे, हे संपलं तर मुंबईत राहणंच मुश्किल होईल. म्हणून मुंबईतील वंचित बहुजन आघाडीच्या सर्व कार्यकर्त्यांनी रविवारच्या आंदोलनात सहभागी व्हावे, असं आवाहन प्रकाश आंबेडकरांनी केलं आहे.
मेट्रो ३ (कुलाबा-वांद्रे-सीप्झ) मार्गिकेतील आरे कारशेडच्या कामासाठी पुढील सुनावणीपर्यंत आरेतील एकही झाड कापू नये असे निर्देश शुक्रवारी सर्वोच्च न्यायालयाने राज्य सरकार आणि मुंबई मेट्रो रेल कॉर्पोरेशन (एमएमआरसी) ला दिले आहेत. तर याबाबत पुढील सुनावणी १० ऑगस्टला होणार आहे.
