राजेंद्र पाटील राऊत
अनसिंग येथील ३५७ राशन कार्ड धारक धान्यापासून वंचित
मंगरुळपीर,(रितेश गाडेकर तालुकाप्रतिनिधी युवा मराठा न्युज नेटवर्क) वाशिम तालुक्यातील अनसिंग येथील ३५७ राशन कार्ड धारकांना मागील पाच वर्षापासून शासनाकडून दर महा मिळणाऱ्या धान्याचा व मोफत धान्याचा पुरवठा होत नाही या सर्व वंचित राशनकार्ड धारकांना जिल्हा प्रशासनाने १५ दिवसा मध्ये धान्य पुरवठा करावा अन्यथा त्या वंचित नागरिकांसह आपण जिल्हाधिकारी कार्यालयासमोर आमरण उपोषणास बसणार असल्याचा इशारा माजी जि.प. सदस्य नत्थुजी कापसे यांनी अनसिंग येथील संतोषी माता बचत गटाच्या स्वस्त धान्य दुकानांमधील ८४ राशन कार्ड धारक, रेणुका माता महिला बचत गटाच्या स्वस्त धान्य दुकानांमध्ये १६७ राशन कार्ड धारक आणि ए.एस.बाजडयांच्या स्वस्त धान्य दुकानावर १०६ राशन कार्ड धारक यांना मागील पाच वर्षापासून शासनाकडून दरमहा मिळणारे धान्य व मोफत धान्य मिळाले नसल्याची बाब नमूद केली आहे. अनसिंग येथील तिन्ही स्वस्त धान्य दुकानातील धान्यापासून वंचित असलेल्या ३५७ राशन कार्डामध्ये एकूण १४१३ युनिट असून हे १४१३ नागरिक मागील पाच वर्षापासून धान्य मिळण्याच्या प्रतीक्षेत आहेत. जिल्हाधिकाऱ्यांनी अनसिंग येथील धान्यापासून वंचित असलेल्या ३५७ राशन कार्ड धारकांना त्वरित धान्याचा पुरवठा करण्यासाठी पुढाकार घ्यावा अशी मागणी माजी जि.प. सदस्य नत्थुजी कापसे यांनी निवेदनाद्वारे केली आहे.
