राजेंद्र पाटील राऊत
पिंपळे गुरव :(उमेश पाटील प्रतिनिधी युवा मराठा न्युज नेटवर्क) येथील ओम साई फाऊंडेशनच्या वतीने आमदार लक्ष्मणभाऊ जगताप यांच्या प्रेरणेतून तसेच शंकरशेठ जगताप यांच्या मार्गदर्शनाखाली दीपावली निमित्त पिंपळे गुरव, नवी सांगवी, जुनी सांगवी या परिसरात किल्ले स्पर्धेचे आयोजन करण्यात आले होते. सोमवारी सायंकाळी या स्पर्धेचे बक्षीस वितरण करण्यात आले. स्पर्धेचे बक्षीस वितरण महापौर उषाताई ढोरे यांच्या हस्ते करण्यात आले.
पिंपळे गुरव येथील ओम साई फाऊंडेशनचे अध्यक्ष संजय मराठे यांनी दीपावली निमित्त किल्ले स्पर्धेचे आयोजन केले होते. या स्पर्धेत १३४ स्पर्धकांनी सहभाग घेतला होता. यामध्ये प्रथम पाच क्रमांक काढण्यात आले होते. तसेच उत्तेजनार्थ १० बक्षिसे देण्यात आली. याप्रसंगी मुलांच्या चेहऱ्यावरील आनंद द्विगुणित झालेला पहावयास मिळाला.
स्पर्धेतील विजेते पुढीलप्रमाणे : सोशल फाऊंडेशन विकास भागवत, जुनी सांगवी (प्रथम), अनंतनगर तरुण मित्र मंडळ, पिंपळे गुरव (द्वितीय), काशिद नगर मित्र मंडळ, पिंपळे गुरव (तृतीय), सिद्धेश देवकर, त्रिमूर्ती कॉलनी, नवी सांगवी (चतुर्थ), कोमल गौंडाडकर, विनायक नगर, पिंपळे गुरव (पाचवा) अशा पाच उत्कृष्ट किल्ला बनविलेल्या स्पर्धकांना सन्मान चिन्ह, शाल, श्रीफळ व पुष्पगुच्छ देऊन त्यांना सन्मानित करण्यात आले.
याप्रसंगी शहराच्या प्रथम नागरिक, महापौर माई ढोरे यांनी स्पर्धकांना सांगितले की किल्ले बनवण्याआधी अथवा साकारत असताना किल्ल्यांची माहिती घेणे. सर्व ऐतिहासिक गड, किल्ले याबद्दल वाचन, अभ्यास करणे. यामुळे मुलांना इतिहासाची उजळणी व त्यांच्या ज्ञानात इतिहासा विषयी जागृती होण्यास मदत होईल.
याप्रसंगी ओम साई फाउंडेशनचे अध्यक्ष संजय मराठे म्हणाले की आमची संस्था दरवर्षी हा उपक्रम राबवत आहे. हा उपक्रम राबविण्याचा खरा उद्देश म्हणजे सदनिका, इमारती, सोसायटी यामध्ये ही पारंपरिक संस्कृती लुप्त होऊ लागलेली आहे. यासाठी दिवाळीमध्ये किल्ले बनविण्याची लहान लहान मुले, तरुण वर्ग, मंडळ यांच्यात आवड निर्माण व्हावी व त्यामागचा महाराजांचा इतिहास कळावा हाच त्यामागचा माझा खरा उद्देश आहे.
कार्यक्रम प्रसंगी ओम साई फाउंडेशनचे अध्यक्ष संजय मराठे, भाजपा महिला प्रभाग अध्यक्ष कोमल गोंडाडकर, नवनाथ देवकर, शैलेश थोरात, सोनू सिंग, विजय पिल्ले आदी मान्यवर, स्पर्धक, परिसरातील नागरिक उपस्थित होते. या कार्यक्रमाचे सूत्रसंचालन विकास भागवत यांनी केले. राजू आवळेकर यांनी आभार मानले.