आशाताई बच्छाव
मतदार जनजागृती चित्ररथाला जिल्हाधिकारी
डॉ. श्रीकृष्ण पांचाळ यांनी दाखविली हिरवी झेंडी
जालना, (दिलीप बोंडे) :- भारत निवडणूक आयोगाच्या निर्देशानूसार नवीन मतदार नाव नोंदणी व ईव्हीएम व्हीव्हीपॅट जनजागृतीबाबत तयार करण्यात आलेल्या एलईडी चित्ररथाला जिल्हाधिकारी डॉ. श्रीकृष्ण पांचाळ यांनी हिरवी झेंडी दाखवून मार्गस्थ केले.
जिल्हाधिकारी कार्यालय परिसरात आज पार पडलेल्या या कार्यक्रमास अप्पर जिल्हाधिकारी रिता मैत्रेवार, उपजिल्हा निवडणूक अधिकारी शशिकांत हदगल, उपविभागीय अधिकारी दीपक पाटील, डॉ.दयानंद जगताप, डॉ.श्रीमंत हारकर, प्रतिभा गोरे, तहसीलदार सुमन मोरे यांची उपस्थिती होती.
जिल्हाधिकारी डॉ. श्रीकृष्ण पांचाळ म्हणाले की, जिल्ह्यात नवीन मतदार नाव नोंदणी, मृत झालेल्या व्यक्तींचे नाव मतदार यादीतून वगळणे, मतदार यादीतील नावात दुरुस्ती करणे, ऑनलाईन मतदार नोंदणी आणि ईव्हीएम व्हीव्हीपॅट मतदान यंत्राच्या जनजागृतीबाबत एकुण 10 एलईडी चित्ररथ गावागावात जाणार असून मतदारांनी ईव्हीएम यंत्रावर प्रत्यक्ष मतदान करुन आपल्या शंकेचे निराकरण करुन घ्यावे, असे आवाहनही त्यांनी यावेळी केले.
जिल्हाभरात राबविली जातेय ईव्हीएम व्हीव्हीपॅट जनजागृती मोहीम
भारत निवडणूक आयोगाच्या निर्देशानूसार व जिल्हाधिकारी तथा जिल्हा निवडणूक अधिकारी डॉ. श्रीकृष्ण पांचाळ यांच्या मार्गदर्शनाखाली दि.10 डिसेंबर 2023 ते 29 फेब्रुवारी 2024 या कालावधीत जिल्ह्यातील पाच विधानसभा मतदारसंघातील 1 हजार 699 मतदान केंद्रावर ईव्हीएम व्हीव्हीपॅट जनजागृती मोहिम राबविण्यात येत आहे. जिल्हाधिकारी कार्यालयात व परतुर, घनसावंगी, जालना, बदनापूर व भोकरदन येथील तहसील कार्यालयात मतदान प्रात्यक्षिक केंद्र स्थापन केले असून याठिकाणी तज्ञ प्रशिक्षकांची नियुक्ती करण्यात आली आहे.
