आशाताई बच्छाव
पाटण्यात तीन महिन्यात पूल उभारण्याचे आश्वासन….
भाविकांचे जलसमाधी आंदोलन स्थगित..
चाळीसगाव प्रतिनिधी विजय पाटील – तालुक्यातील पाटणादेवी येथे चंडिका मातेच्या मंदिराकडे जाणाऱ्या नदीवर पूल नसल्याने भाविकांना अडचणींना समोरे जावे लागते. यंदाच्या नवरात्रोत्स सुरू होण्यापूर्वी या नदीवर पूल न उभारल्यास आज 11 ऑक्टॉबर रोजी जलसमाधी घेण्याचा इशारा भाविकांनी दिला होता.मात्र या पुलासाठी दिल्ली येथून लवकरच परवानगी घेऊन पुलाची निर्मीती करण्याचे सार्वजनिक बांधकाम विभागाला सुचीत केले जाईल. येत्या तीन महिन्यात येथे नवीन पूल उभारला जाईल असे लेखी आश्वासन छत्रपती संभाजी नगर येथील भारतीय पुरातत्त्व विभागाच्या अधिकाऱ्यांनी दिल्याने भाविकांनी आंदोलन तुर्त स्थगित केले. मात्र काम जर प्रगतीपथावर दिसले नाही तर पुन्हा आम्ही आंदोलनावर ठाम राहू असा इशाराही भाविकांनी यावेळी दिला. यावेळी चाळीसगाव ग्रामीण पोलीस स्टेशनचा तगडा बंदोबस्त ठेवण्यात आला होता.
आज सकाळी दिपक पाटील, राकेश निकम, पाटणा सरपंच नितीन पाटील यांच्यासह पाटणा, पिंपरखेड, चितेगाव, वालझिरी, गणेशपूर भागातील 70 ते 80 ग्रामस्थासह भाविक जलसमाधी आंदोलनासाठी नदीपात्रात उतरले. यावेळी ग्रामीण पोलीस स्टेशनचे पोलीस निरीक्षक ज्ञानेश्वर जाधव यांच्या मार्गदर्शनाखाली तडगा पोलीस बंदोबस्त तैनात करण्यात आला होता. पोलीस निरीक्षक जाधव पुरातत्व विभागाचे पत्र गावकरी तसेच भाविकांना दाखवले. तीन महिन्यात मंजुरी मिळवून पुलाचे काम सुरू करू त्यासाठी वेळ द्या असे लेखी पत्र दिल्यानंतर पोलीस अधिकारी व पुरातत्व विभागाच्या अधिकाऱ्यांनी आंदोलक भाविकांसह चर्चा केल्यानंतर भाविकांनी आंदोलन स्थगित केले.
