आशाताई बच्छाव
पिंपळे गुरवमध्ये यशोदा पुरंम सोसायटीत शॉर्ट सर्किटमुळे आग
सोसायटीच्या सातव्या मजल्यावर फ्लॅटमध्ये लागली आग
फ्लॅटमधील सर्व साहित्य सामग्री जळून खाक पुणे,(उमेश पाटील प्रतिनिधी)
पिंपळे गुरव येथील सारंग चौधरी यांनी स्वप्नातले एक घर काही वर्षांपूर्वी लोन काढून घेतले होते. या घरात पती पत्नी आणि मुलगा आनंदाने वास्तव्य करीत होते. नुकतेच गणपतीही घरी आले होते. यानिमित्त गावाहून आई वडीलही आले होते. मात्र काळाने क्षणार्धात सर्व संसार उध्वस्त केला. यावेळी अचानक राहत्या घरात शॉर्ट सर्किट झाल्याने आग लागून सर्व काही जळून खाक झाले होते.
नवी सांगवी : पिंपळे गुरव येथील साईनाथ नगर मधील यशोदा पुरंम सहकारी गृहरचना संस्था सोसायटीमध्ये गुरुवार (दि. १) रात्री दहाच्या सुमारास आग लागली. ही आग इमारतीच्या सातव्या मजल्यावरील बी विंग मधील ७०१ नंबरच्या सदनिकेत लागली होती. आगीत सदनिकेतील सर्व साहित्य जळून खाक झाले होते. मात्र कोणतीही जीवित हानी झाली नाही.
येथील सोसायटीत गणेशोत्सवा निमित्त सांस्कृतिक कार्यक्रम सुरू होते. यावेळी आग लागलेल्या फ्लॅट मधील सारंग चौधरी, त्यांची पत्नी, मुलगा, आई वडील सांस्कृतिक कार्यक्रमात सहभागी होण्यासाठी खाली आले होते. रात्री दहाच्या सुमारास इमारतीच्या सातव्या मजल्यावरून धूर पसरत असल्याचे आजूबाजूच्या परिसरातील नागरिकांना निदर्शनास आले. त्यांनी त्वरित सोसायटीतील नागरीकांना आग लागत असल्याची माहिती दिली. यावेळी उपस्थित नागरिकांनी गांभीर्य लक्षात घेऊन त्वरित राहटणी, वल्लभनगर अग्निशामक दलाला संपर्क करून कळविले.
यावेळी अग्निशामक दलाची तीन वाहने घटनास्थळी दहा वाजून पंचवीस मिनीटांनी दाखल झाली. अग्निशामक दलाच्या २० ते २५ जवानांनी याप्रसंगी तत्परता दाखवत सातव्या मजल्यावरील आग लागलेल्या सदनिकेतील आग आटोक्यात आणण्याचा प्रयत्न करीत असल्याचे दिसून आले. यावेळी आगीच्या ज्वाला इमारतीच्या बाहेर मोठ्या प्रमाणात पसरत असल्याचे पहावयास मिळत होते. रात्री अकराच्या सुमारास अग्निशामक दलाचे जवानांनी शर्थीचे प्रयत्न करून आग आटोक्यात आणली.
यावेळी आग लागलेल्या फ्लॅट मधील फर्निचर, एसी, टीव्ही, फ्रीज, लॅपटॉप, ओव्हन, सोफासेट आदी साहित्य सामग्री जळून खाक झाल्याचे सांगण्यात आले. ही आग शॉर्ट सर्किटमुळे लागल्याचे वल्लभनगर येथील अग्निशामक दलाचे लिडिंग फायरमन विकास नाईक यांनी यावेळी सांगितले. यावेळी सोसायटीच्या इमारतीमधील सर्व सदनिकाधारक भयभीत होऊन रस्त्यावर उतरले होते. प्रसंगावधान राखण्यासाठी इमारतीच्या लिफ्ट, गॅस पुरवठा करणारी एमएनजीएल पाईपलाईन, वीज बंद करण्यात आली होती.
याप्रसंगी सोसायटीमधील नागरिकांना धीर देण्यासाठी स्थानिक चिंचवड विधानसभा निवडणूक प्रमुख शंकर जगताप, माजी नगरसेवक सागर आंगोळकर, महेश जगताप, शिवाजी कदम, अजय दूधभाते, पोलीस नाईक राजू मछे उपस्थित होते. यावेळी शर्थीचे प्रयत्न करून आग आटोक्यात आणणाऱ्या अग्निशामक दलाच्या जवानांचे तसेच सांगवी पोलिसांचे उपस्थित नागरिकांनी आभार मानले.
