राजेंद्र पाटील राऊत
मच्छी विक्री उघड्यावर कारवाईची मागणी (ब्यूरो चिफ स्वप्निल देशमुख यूवा मराठा न्यूज बुलडाणा
पातुर्डा: येथील आठवडी बाजारात मच्छी विक्री उघड्यावर सुरू असल्याने स्थानिक व्यवसायिक अडचणीत आले आहेत. याबाबत ग्रामपंचायत प्रशासनाकडे तक्रारी दिल्या असताना काहीच कारवाई निघत नसल्याने स्थानिक व्यावसायिकांनी सोशल मिडीया वर हा विषय मांडला आहे. सोमवारी 21फेब्रुवारी रोजी हा विषय पुन्हा चव्हाट्यावर आला आहे.
मटन व मच्छी मार्केट ला स्वतंत्र जागा देऊन रहदारीचा रस्ता व व्यावसायिक जागा मोकळी करावी अशी मागणी समोर आली आहे. स्थानिक ग्रामपंचायत प्रशासनाने यात पुढाकार घेऊन दोन्ही व्यावसायिकांना न्याय देण्याची गरज आहे.
पातुर्डा येथील आठवडी बाजारात बहुतेक सर्वच उद्योग धंदे गजबजलेल्या जागेत चालतात. गायत्री नगर कडे जाणारा रस्ता मच्छी विक्री मुळे बंद पडला आहे. या ठिकाणी नाश्ता हाॅटेल्स, चहाची दुकाने, सलून व्यावसायिक आपापला व्यवसाय करतात. पण मच्छी च्या वासामुळे या भागात ग्राहक फिरकेनासे झाले आहेत. यामुळे लहान सहान व्यावसायिक अडचणीत आले आहेत. स्थानिक सलून व्यावसायिक ज्ञानेश्वर अतकारे यांनी याप्रकरणी सोशल मिडीया वर विडीयो पोस्ट केला. याला चांगला प्रतिसाद मिळाला आहे. सलून व्यावसायिकांनी याबाबत ग्रामपंचायत प्रशासनाकडे तक्रारी दिल्या आहेत. मात्र हा विषय निकालात निघाला नाही. यामुळे व्यावसायिक संतप्त प्रतिक्रिया व्यक्त करत आहेत. दरम्यान ग्रामसचिव यांच्याशी संपर्क होऊ शकला नाही. सोमवार दि 21 फेब्रुवारी रोजी हा विषय पुन्हा चव्हाट्यावर आला असल्याने वातावरण ढवळून निघाले आहे.
”
आमच्या दुकानासमोर मच्छी विक्री उघड्यावर सुरू असल्याने स्थानिक व्यावसायिकांनी ग्रामपंचायत प्रशासनाकडे 26 ऑक्टोबर 21 रोजी तक्रार दिली आहे. याप्रकरणी ग्रामपंचायत ने काही कारवाई केली नाही. आमचे व्यवसाय बंद पडत असल्याने उपासमारीची पाळी आली आहे.
-ज्ञानेश्वर अतकारे
सलून व्यावसायिक पातुर्डा