🛑 नाशिक शहरात सुसज्ज असे कोविड सेंटर 🛑

राजेंद्र पाटील राऊत

🛑 नाशिक शहरात सुसज्ज असे कोविड सेंटर 🛑
✍️ नाशिक 🙁 विजय पवार महाराष्ट्र प्रतिनिधी युवा मराठा न्युज)

नाशिक :-⭕संपूर्ण देशात तसेच राज्यात कोरोना विषाणूचा प्रादुर्भाव वाढत आहे. हे संक्रमण रोखण्यासाठी राज्यस्तरावर अनेक प्रयत्न सुरू आहेत. रुग्णसंख्येत वाढ होत असल्याने रुग्णांना उपचाराकरीता बेड मिळणे कठीण झाले आहे. या संकटाचे गांभीर्य लक्षात घेऊन राष्ट्रवादी काँग्रेस पक्षाचे ज्येष्ठ नेते व नाशिक जिल्ह्याचे पालकमंत्री ना.छगन भुजबळ यांच्या पुढाकाराने नाशिक शहरात सुसज्ज असे कोविड केअर सेंटर उभारण्यात आले आहे. आज या कोविड केअर सेंटरचे उद्घाटन राष्ट्रवादी काँग्रेस पक्षाचे अध्यक्ष खा. शरद पवार यांच्या हस्ते ऑनलाईन पद्धतीने करण्यात आले.

भुजबळ कोविड केअर सेंटरच्या उभारणीसाठी मेट भुजबळ नॉलेज सिटी, राष्ट्रवादी काँग्रेस पार्टी, समता परिषद व नाशिक महानगरपालिका यांचा मोलाचा वाटा आहे.

या सेंटरमध्ये १८० ऑक्सिजन तर ११५ सीसीसी बेडची व्यवस्था करण्यात आली आहे. आज या सेंटरचे उद्घाटन करताना संपूर्ण सेंटरची माहिती पालकमंत्री छगन भुजबळ यांनी मांडली. तसेच हे काम शरद पवारसाहेबांच्या मार्गदर्शनाखाली करण्यात आले आहे, असे भुजबळ यांनी सांगितले. राज्यातील सर्व साखर कारखाने, शिक्षण संस्था व मोठे उद्योगधंदे प्रत्येकाने या लढाईत सहभाग घ्यावा व आपल्या भागात अशा प्रकारचे कॅम्प उभारावे असे आवाहन छगन भुजबळ यांनी यावेळी केले.

आदरणीय खा. शरद पवार यांच्या हस्ते ऑनलाइन पद्धतीने या कोविड केअर सेंटरचे उद्घाटन करण्यात आले. यावेळी शरद पवार यांनी सभेला संबोधित केले.

संपूर्ण विश्र्वामध्ये आज महामारीचे संकट आल्यानंतर त्या संकटग्रस्तांना आधार देण्याचे जे काम सुरू आहे. त्यातील मोलाचा भाग आज आपल्याला नाशिक शहरात पाहायला मिळत आहे याचा आनंद आहे, असे पवार म्हणाले. आज जे संकट आले आहे त्यावर मात करण्यासाठी छगन भुजबळ यांच्या नेतृत्वाखाली तसेच भुजबळ नॉलेज सिटी, नाशिक महानगरपालिका, राष्ट्रवादी काँग्रेस पक्ष, समता परिषद आणि इतर सहकारी यांच्या प्रयत्नाने एक सुसज्ज असे सेंटर उभे करण्यात आले आहे. याचे वैशिष्ट्य म्हणजे स्वयंसेवी संस्थांच्या माध्यमातून उभे केलेले कोविड सेंटर हे केवळ रुग्णाच्या विलागिकरणासाठी असतात. स्वयंसेवी संस्था आणि राजकीय पक्षाने सुरू केलेलं व ऑक्सिजन असलेले नावीन्यपूर्ण कोविड सेंटर नाशिकमध्ये आज प्रथमच उभे राहते आहे असे पवार म्हणाले.

ज्याप्रमाणे शासकीय, वैद्यकीय घटक हे संक्रमण रोखण्याचा प्रयत्न करत आहेत. त्याप्रमाणे एक समाज घटक म्हणून राज्यात अनेक उत्तम संस्था, मोठे उद्योगांनी पुढे येऊन भुजबळ नॉलेज सिटी मधील हा उपक्रम डोळ्यासमोर ठेवत इतक्या मोठ्या प्रमाणात जरी शक्य नसल्यास काही प्रमाणात असे सेंटर आपल्या भागातही निर्माण करावे असे आवाहन शरद पवार यांनी केले.

या उद्घाटनप्रसंगी माजी खा. समीर भुजबळ, पंकज भुजबळ, राष्ट्रवादी काँग्रेस डॉक्टर सेलचे पदाधिकारी, समता परिषदेचे पदाधिकारी, नाशिक महानगरपालिका अधिकारी, तसेच इतर राजकीय व शासकीय पदाधिकारी उपस्थित होते.⭕