आशाताई बच्छाव
दारुड्यानं ‘त्या’ मागासवर्गीय तरुणाला विवस्त्र करत केली अमानुष मारहाण ; सोनई पोलीस ठाण्यात ‘ॲट्रॉसिटी’चा गुन्हा दाखल. नेवासा,( कारभारी गव्हाणे तालुका प्रतिनिधी)-
नेवासे तालुक्यातल्या सोनई – घोडेगाव लगतच्या एका हॉटेलसमोर एका दारुड्याने दुसऱ्याला बेदम मारहाण करत विवस्त्र करुन रस्त्याच्या कडेला टाकून दिलं. सदर तरुण रक्ताच्या थारोळ्यात पडल्याचं पाहिल्यावर काही सामाजिक कार्यकर्त्यांनी त्या तरुणाला अहमदनगरच्या सिव्हिल हॉस्पिटलमध्ये उपचारासाठी दाखल केलं. त्या तरुणाच्या डोक्याला जबर मार लागल्यानं तो गंभीर जखमी झाला आहे.
‘डोक्या’ या टोपणनावानं प्रसिद्ध असलेला हा तरुण सोनईत ठिकठिकाणी फिरत होता. अनेकांना काम मागत एखादं छोटंसं काम मिळालं, की त्यातले बरेचसे पैसे दारुवर खर्च करायचा. सोनईच्या बसस्थानक परिसरासह स्वामी विवेकानंद चौक, शिवाजी चौक, सोनई – राहुरी रोड, राजवाडा आदी भागांत हा तरुण नेहमी फिरत असल्याचं अनेकांनी पाहिलं आहे. दरम्यान, काल (दि. १3) रात्री उशिरा एका दारुड्यात आणि या तरुणाची बाचाबाची झाली. या बाचाबाचीचं रुपांतर हाणामारीत झालं.
या मारहाणीत हा तरुण गंभीर जखमी झाला असून त्याच्या मेंदूत रक्ताच्या गाठी झाल्या असून त्याला उपचारासाठी पुण्यातल्या हॉस्पिटलमध्ये नेण्यात येणार असल्याचं सांगण्यात आलं आहे. मारहाणीच्या घटनेप्रकरणी सोनई पोलीस ठाण्यात भादंवि ३०७ आणि ॲट्रॉसिटी ॲक्टनुसार गुन्हा दाखल करण्यात आला आहे. या घटनेमुळे सोनई आणि परिसरात उलट सुलट चर्चा ऐकायला मिळत आहेत. सोनई पोलीस ठाण्याचे सहाय्यक पोलीस निरीक्षक माणिक चौधरी यांच्या मार्गदर्शनाखाली या घटनेचा पुढील तपास सुरु आहे.