आशाताई बच्छाव
नाशकात लाचखोरीने गाठला कळस… आणखी एक मोठा मासा गळाला… तब्बल ४० लाखांची लाच प्रकरणी दिंडोरी प्रांत जाळ्यात…
भास्कर देवरे (युवा मराठा न्यूज नेटवर्क)
नाशिक:- नाशिकमध्ये लाचखोरीने कळस गाठला आहे. गेल्या सहा महिन्यात अनेक लाचखोरांवर कारवाई झाली आहे. त्यात मोठ्या धेंडांचाही समावेश आहे. आताही एक मोठा मासा लाचलुचपत प्रतिबंधक विभागाच्या (एसीबी) अडकला आहे. दिंडोरीचे उपविभागीय अधिकारी (प्रांत) निलेश अपार हा तब्बल ४० लाखांच्या लाच प्रकरणात एसीबीच्या सापळ्यात सापडला आहे. त्यामुळे एकच खळबळ उडाली आहे.
नाशिक शहरासह जिल्ह्यात प्रचंड लाचखोरी सुरू असल्याचे दिसून येत आहे. त्यामुळेच आठवड्याला किमान २ जण तरी लाच घेताना पकडले जात आहेत. एसीबीच्या अधिक्षक शर्मिष्ठा वालावलकर यांच्या नेतृत्वाखाली उत्तर महाराष्ट्रात जोरदार कारवाई आहे. त्यामुळे तक्रारदारांचे प्रमाणही वाढत असून लाचखोर दिवसागणिक समोर येत आहेत. आतापर्यंत जिल्हा उपनिबंधक, शिक्षणाधिकारी यासारखे बडे अधिकारी जाळ्यात अडकले आहेत. आताही महसूल विभागातील क्लास वन अधिकारी एसीबीच्या गळाला लागला आहे.दिंडोरीचा उपविभागीय अधिकारी निलेश अपार हा एसीबीच्या सापळ्यात अडकला आहे. एका खाजगी कंपनीची जागा अकृषक (एनए) करुन देण्यासाठी अपार याने तब्बल ४० लाख रुपयांची लाच मागितली होती. त्यानंतर याबाबत एसीबीकडे तक्रार आली. एसीबीने सापळा रचला. आणि अपार हा ४० लाखांची लाच घेताना सापडला आहे. याप्रकरणी एसीबीच्या पथकाकडून अपार याची चौकशी सुरू असून दिंडोरी पोलिस स्टेशनमध्ये गुन्हा दाखल करण्याचे काम सुरू आहे.एसीबीच्या या मोठ्या कारवाईमुळे लाचखोरांचे धाबे दणाणले आहेत. शिवाय महसूल यंत्रणाही अतिशय सतर्क झाली आहे. आतापर्यंत शिक्षण, पोलिस अशा विविध विभागात सापळे यशस्वी होत होते. आता महसूल विभागातही लाचखोरी बोकाळल्याचे दिसून येत आहे. दरम्यान, याप्रकरणी एसीबीकडून लवकरच मोठी माहिती सादर केली जाणार आहे.