आशाताई बच्छाव
श्रीरामपूर शहर हद्दीवर ‘बिबट्या’ कॅमेऱ्यात कैद श्रीरामपूर, दिपक कदम तालुका प्रतिनिधी –श्रीरामपूर शहरातील वॉर्ड नं. ७ जवळ असणाऱ्या महाले पोदार शाळेच्या पुढे असणाऱ्या गोठ्याच्या सीसीटीव्ही कॅमेऱ्यात बिबटया कैद झाला आहे. त्यामुळे श्रीरामपूर शहर हद्दीवर बिबट्या आल्याचे यातून स्पष्ट होत आहे. याबाबतची अधिक माहिती अशी की, बेलापूर नाक्याच्या पूर्व बाजूला असणाऱ्या महाले पोदार शाळेच्या पुढे विरेंद्र यादव यांचा गायांचा गोठा आहे. या गोठ्याजवळ त्यांनी सीसीटीव्ही कॅमेरा लावलेला आहे. आज पहाटे एक बिबट्या या ठिकाणी आला. त्याने कुत्र्यावर झडप मारली मात्र हे कुत्रे पळून जाण्यात यशस्वी झाले. त्यानंतर बिबट्याही त्याच्या दिशेने जाताना या सीसीटीव्हीत दिसत आहे. बिबट्याच्या अचानक येण्यामुळे येथे बांधलेली गायी-म्हशी जनावरं काही काळ बिथरली होती. अगदी शहराच्या हद्दीवर हा बिबट्या आल्याचे यावरून स्पष्ट होते. त्यामुळे पहाटे फिरायला जाणाऱ्यांनी आता काळजी घेण्याची गरज निर्माण झाली आहे.
