आंशुराज पाटिल मालेगाव कार्यालय
मालेगाव, दिनांक 11 जुलै, 2023 (उमाका वृत्तसेवा):
‘शासन आपल्या दारी’अभियांनातर्गत आयोजित नाशिक जिल्हास्तरीय कार्यक्रम मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांच्या उपस्थितीत 15 जुलै रोजी नाशिक येथे होणार आहे. या कार्यक्रमाची पूर्व तयारी बैठक बंदरे व खनिकर्म मंत्री तथा जिल्ह्याचे पालकमंत्री दादाजी भुसे व जिल्हाधिकारी गंगाथरन डी. यांनी आज घेतली. त्याअनुषंगाने मालेगाव तालुका प्रशासनाने या कार्यक्रमाची तयारी केली असून तालुक्यातील एकूण दहा हजार लाभार्थ्यांना या कार्यक्रमाच्या माध्यमातून विविध योजनांचा लाभ देण्यात येणार असल्याचे मालेगावचे तहसिलदार नितिनकुमार देवरे यांनी सांगितले.
जिल्ह्यातील ‘शासन आपल्या दारी’ कार्यक्रमांतर्गत 15 जुलै रोजी मालेगाव तालुक्यातून एकूण 40 बसेसचे नियोजन करण्यात आले आहे. मंडळ मुख्यालयातून या बसेस दिनांक 15 जुलै रोजी सकाळी 7 वाजता लाभार्थ्यांना घेऊन नियोजित स्थळी निघणार आहेत. यासाठी एकूण 120 कर्मचाऱ्यांची नेमणूक लाभार्थी घेऊन जाण्यासाठी व त्यांना परत आणण्यासाठी करण्यात आली आहे. तसेच बसेसमध्ये आरोग्य सेवकांची देखील नियुक्ती केली असून प्रथमोपचार सुविधाही उपलब्ध करुन देण्यात आली आहे, अशी माहिती तहसिलदार नितीनकुमार देवरे यांनी यावेळी दिली.
त्याअनुषंगाने मालेगांव तालुक्यातील विविध योजना लाभार्थ्यांपर्यंत पोहचविण्यासाठी तालुका प्रशासनाने तयारी केली असून एकूण दहा हजार लाभार्थ्यांना लाभ मिळणार आहे. यात रेशनकार्ड, सेतू दाखले, घरकुल योजना, ठिबक योजना, पोकरा योजना व वैद्यकीय विभागामार्फत योजनेचे लाभ कार्यक्रमात दिले जाणार आहे.
या बैठकीस दूरदृष्यप्रणालीद्वारे उप विभागीय कृषी अधिकारी गोकुळ अहिरे, पुरवठा निरीक्षक पी. एस. काथेपूरी, गट विकास अधिकारी भरत वेंदे आदींसह विविध विभागांचे अधिकारी उपस्थित होते.
