आशाताई बच्छाव
उमरद येथील शेतकऱ्याच्या ८ शेळ्या आकस्मिक मृत्युमुखी ; शेतकऱ्याचे १ लाख ५० हजाराचे नुकसान….
युवा मराठा न्यूज बुलडाणा जिल्हा ब्युरो चीफ संजय पन्हाळकर
बुलडाणा:-सिंदखेड राजा उमरद देशमुख येथील शेतकरी पुंडलिक ग्यानबा चंद्रे या शेतकऱ्याच्या तब्बल १ लाख ५० हजार रुपये किमतीच्या ८ शेळ्या शेतात चरत असताना आकस्माक मृत्युमुखी पडल्याने शेतकऱ्याचे नुकसान झाले आहे. शेतकरी असलेल्या पुंडलिक ग्यानबा चंद्रे यांच्याकडे एकूण ४० शेळ्या असून त्यांचा शेळी पालन त्यांचा व्यवसाय आहे. दिनांक २४ रोजी दुपारी अडीच वाजेच्या दरम्यान त्यांनी आपल्या सर्व शेळ्या नेहमीप्रमाणे चरण्यासाठी सोडल्या असता प्रथम त्यातील २ शेळ्यानी आकस्मिकपणे मान टाकली व त्या खाली कोसळल्या अचानकपणे खाली पडलेल्या शेळ्या खाली का कोसळल्या हे पाहण्यासाठी गेले असता त्याच कळपातील इतर ६ शेळ्याही अचानक खाली कोसळल्या व जागीच गतप्राण झाल्या.
यावेळी चंद्रे यांनी येथील पशुधन पर्यावेक्षक डॉ.साहिल देशमुख व डॉ.मयूर केवट यांना माहिती दिली त्यांनी घटनास्थळी भेट देऊन हे कशामुळे झाले असेल याचे निदान करण्याकरिता मृत शेळ्यांचे शवविच्छेदन केले त्याचा रिपोर्ट अद्याप आला नसून इतर शेळ्यानाही असा अपाय होऊ नये म्हणून त्वरित लसीकरण केले.
महसूल अधिकारी पांडव यांना माहिती मिळताच त्यांनी सहाययक ढाकणे यांना सोबत घेऊन घटनेचा पंचनामा करन वरिष्ठांना माहिती कळविली आहे.यावेळी सरपंच पंढरीनाथ उबाळे,संतोष गिरी,भगवान नागरे,बाळासाहेब मुळे, प्रदीप घायवट, विलास बोडखे यांच्यासह परिसरातील शेतकरी उपस्थित होते.
