आशाताई बच्छाव
राज्यस्तरीय क्रीडा स्पर्धा यशस्वीपणे पार
पाडण्यासाठी सुयोग्य नियोजन करावे
–जिल्हाधिकारी डॉ.श्रीकृष्ण पांचाळ
जालना (दिलीप बोंडे) :- राज्यस्तरीय शालेय खो-खो व बेसबॉल स्पर्धां जालना जिल्ह्यात आयोजित करण्यात आलेल्या आहेत. तरी राज्यस्तरीय क्रीडा स्पर्धेत सहभागी होणाऱ्या मुला-मुलींना निवासासह भोजनाची उत्तम सोय उपलब्ध करुन द्यावी तसेच संबंधित यंत्रणेच्या अधिकाऱ्यांनी राज्यस्तरीय क्रीडा स्पर्धा यशस्वीपणे पार पाडण्यासाठी सुयोग्य नियोजन करावे, असे निर्देश जिल्हाधिकारी डॉ. श्रीकृष्ण पांचाळ यांनी केले.
राज्यस्तरीय शालेय खो-खो व बेसबॉल स्पर्धा आयोजनाबाबतची पुर्व तयारी आढावा बैठक शुक्रवार दि.10 नोव्हेंबर 2023 रोजी दुपारी 1 वाजता जिल्हाधिकारी यांच्या दालनात पार पडली, याप्रसंगी ते बोलत होते. यावेळी जिल्हा क्रीडा अधिकारी अरविंद विद्यागर यांच्यासह संबंधित विभागाचे अधिकारी उपस्थित होते.
जिल्हाधिकारी डॉ.पांचाळ म्हणाले की, राज्यस्तरीय क्रीडा स्पर्धेत सहभागी होणाऱ्या मुला-मुलींना विभागनिहाय वेगवेगळ्या रंगाचा ट्रॅकसुट उपलब्ध करुन देण्यात यावा तसेच ट्रॅकसुटवर सुस्पष्ट विभागनिहाय नावे मुद्रीत करावी. विजेत्या संघाला देण्यात येणाऱ्या पारितोषिकात नामांकित कंपनीच्या स्पोर्ट वॉचचा समावेश करावा. तुमच्या डोक्यात काही नवनवीन संकल्पना असल्यास मला सांगा, त्यांचाही विचार करण्यात येईल, असेही त्यांनी यावेळी सांगितले.
जिल्हा क्रीडा अधिकारी अरविंद विद्यागर यांनी वर्ष 2023-24 या वर्षात 14 वर्षाखालील मुला-मुलींसाठी राज्यस्तरीय शालेय खो-खो स्पर्धां जालना शहर महानगरपालिकेजवळील जिल्हा परिषद निवासी क्रीडा प्रबोधिनीमध्ये दि.22 ते 24 नोव्हेंबर 2023 या कालावधीत घेण्यात येणार आहेत.
