आशाताई बच्छाव
पोलीस अधीक्षकांचा फोटो आणि नाव वापरून सायबर भामट्याने घातला धुमाकूळ
मोहन चव्हाण
ब्युरो चीफ बीड जिल्हा
बीड – काळ बदलला तसा उद्योग उलट सुलट उद्योग करणाऱ्या भामट्यांच्या कृतीतही बदल झाला आहे. यात सर्वात जास्त कुणी धुमाकूळ घातला असेल तर तो ऑनलाइन यंत्रणेचा उपयोग करून गंडा घालणाऱ्या भामट्यानी. यातून चक्क बीड जिल्हा पोलीस अधीक्षक नंदकुमार ठाकूर हेही सुटले नाहीत. त्यांचे नाव आणि फोटो वापरून सायबर भामट्याने धुमाकूळ घातल्याचे लक्षात येताच दस्तूर खुद पोलीस अधीक्षक नंदकुमार ठाकूर यांना अशा कोणत्याही ऑनलाईन फसवणुकीला प्रतिसाद देऊ नये असे आवाहन करावे लागले आहे. ऑनलाइन फसवणुकीचे प्रकार दिवसेंदिवस वाढत चालले आहेत. पोलीस किंवा इतर प्रतिष्ठित व्यक्तीचे नाव व फोटो वापरून त्यांच्या फ्रेंड लिस्ट मधील लोकांना मेसेज पाठवला जात आहे. यापूर्वी असे अनेक प्रकार घडले असून याची सायबर पोलीस ठाण्यात नोंदही झालेली आहे. असाच प्रकार शुक्रवारी ही घडला आहे. बीड जिल्हा पोलीस अधीक्षक नंदकुमार ठाकूर यांचा फोटो व नाव वापरून सायबर भामट्यांनी काही लोकांना मेसेज केले आहेत. या मेसेज मधून कुणालाही अद्याप तरी पैसे मागितल्याचे समोर आलेले नसले तरी फोटो व नाव वापरण्याची माहिती स्वतः नंदकुमार ठाकूर यांनी सोशल मीडियावर देत अशा खोट्या अकाउंट पासून सावध राहावे, त्यांना प्रतिसाद देऊ नये असे आवाहन केले आहे. समाजात एकीकडे सर्वसामान्यांच्या मागे लागलेले सायबर भामटे वेगवेगळे आमिष दाखवून ऑनलाइन फसवणूक करीत असतात. परंतु आता तर चक्क पोलीस अधीक्षकांचा फोटो व नाव वापरून व्हाट्सअप वरून फसवणूक करण्याचा प्रकार केला जात असल्याचा दस्तुर खुद नंदकुमार ठाकूर यांनी फेसबुक वर पोस्ट टाकल्यानंतर समोर आले आहे.