आशाताई बच्छाव
१० हजाराची लाच घेताना महिला उपजिल्हाधिकाऱ्यांना बेड्या
मोहन चव्हाण
ब्युरो चिफ बीड जिल्हा
बीड दि:२६ रोजी तलावात गेलेला जमिनीचा आणि घराचा मावेजा देण्यासाठी बीडच्या भूसंपादन विभागाच्या महिला उपजिल्हाधिकारी भारती सागरे यांनी १० हजार रुपयाची लाच मागितली. हीच लाच एक निवृत्त मंडळ अधिकाऱ्यांच्या मार्फत स्वीकारताना एसीबीने रंगेहात पकडले. ही कारवाई गुरुवारी दुपारी तीन वाजता भूसंपादन विभागाच्या कार्यालयात केली. सलग दुसऱ्या दिवशीही महसूल विभागात दोन कारवाया झाल्याने खळबळ उडाली आहे.
बीड तालुक्यातील एका गावातील तक्रारदाराच्या आईच्या नावे असलेली जमीन व घर हे गावातीलच तलावात गेले होते. त्याचा ०५ लाख ६८ हजार ९६५ रुपये एवढा मावेजा मिळाला. यासाठी भूसंपादन विभागाकडे अर्ज केला होता. परंतु उपजिल्हाधिकारी भारती साखरे यांनी हा अर्ज निकाली काढण्यास टाळाटाळ केली. शिवाय १० हजार रुपयांची लाचही मागितली. यावर पाच दिवसांपूर्वी संबंधिताने बीडच्या लाचलूचपत प्रतिबंधात्मक विभागाकडे तक्रार केली. एसीबीने गुरुवारी दुपारी भूसंपादन विभागाच्या कार्यालयात सापळा लावला. सागरे यांनीच वसुलीसाठी नेमलेला सेवा निवृत्त मंडळ अधिकारी नवनाथ प्रभाकर सरवदे (रा.अंबाजोगाई) यांच्याकडे लाच देण्यास सांगितले. लाचेची रक्कम स्वीकारताच एसीबीने त्यांना रंगेहात पकडले. त्यांच्या विरोधात शिवाजीनगर पोलीस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. ही कारवाई पोलीस अधीक्षक संदीप आटोळे, प्र अप्पर पोलीस अधीक्षक राजीव तळेकर, उपअधीक्षक शंकर शिंदे यांच्या मार्गदर्शनाखाली सापळा अधिकारी गुलाब भाचेवाड, सहाय्यक सापळा अधिकारी अमोल धस, श्रीराम गिराम, अमोल खरसाडे, अविनाश गवळी, भारत गारदे, अंबादास पुरी, स्नेहलकुमार कोरडे, सत्यनारायण खेत्रे आदींनी केली.
सलग दुसऱ्या दिवशीही मोठी कार्यवाही
माजलगावच्या उपविभागीय कार्यालयातील लिपिक वैभव जाधव व अश्फाक शेख या दोघांना जात प्रमाणपत्र देण्यासाठी ३० हजार रुपयाची लाच घेताना बुधवारी रंगेहात पकडले होते. यातही माजलगाव च्या उपविभागीय अधिकारी निलम बाफना संसयाच्या भोवऱ्यात आहेत. त्या पाठोपाठ गुरुवारी लगेच बीडच्या उपजिल्हाधिकारी भारती सागरे व खाजगी इसमास पकडण्यात आले. एसीबीने सलग दुसऱ्या दिवशी मोठी कारवाई केल्याने महसूल विभागात खळबळ उडाली आहे.