आशाताई बच्छाव
प्रेषित मोहम्मद पैगंबरांबद्दल वादग्रस्त विधान भाजप आमदाराला हैदराबादमध्ये अटक हैद्राबाद,(ब्युरो टिम युवा मराठा न्युज नेटवर्क)
प्रेषित मोहम्मद पैगंबर यांच्याबाबत आक्षेपार्ह वक्तव्य केल्याप्रकरणी भाजपचे गोशामहलचे आमदार टी. राजा सिंह यांना मंगळवारी अटक करण्यात आली आहे. राजा यांनी केलेल्या वक्तव्यांचा व्हिडीओ व्हायरल झाल्यानंतर हैदराबाद शहरात सोमवारी रात्री जमावाने पोलीस ठाण्यासमोर आंदोलन करत राजा यांच्या अटकेची मागणी केली होती. यामुळे शहरामध्ये तणावाची परिस्थिती निर्माण झाली होती. या आंदोलनानंतर मंगळवारी सकाळी टी. राजा सिंह यांना अटक करण्यात आल्याचे उपायुक्त पी. साई. चैतन्य यांनी सांगितले.
सोबतच आता भाजपनेदेखील टी. राजा सिंह यांच्या चिथावणीखोर वक्तव्यावर कारवाई करत त्यांना कारणे दाखवा नोटीस बजावली आहे. चौकशी पूर्ण होईपर्यंत त्यांना पक्षातून निलंबित करण्यात आले आहे. श्री राम चॅनेल तेलंगण नावाच्या युट्यूब चॅनेलवरून फारुकी के आँख का इतिहास सुनिये’ या नावाने राजा यांनी सोमवारी हा वादग्रस्त व्हिडीओ शेअर केला होता. या व्हिडीओमध्ये भाजपच्या निलंबित प्रवक्त्या नुपूर शर्मा यांच्या संदर्भातून टी. राजा यांनी फारुकीच्या कॉमेडी शोवर टीका केली. शर्मा यांचे थेट नाव न घेता राजा वादग्रस्त विधानांचा उल्लेख करताना व्हिडीओत दिसत आहेत.
