आशाताई बच्छाव
चित्पावन ब्राह्मण मंडळाच्या बुस्टर डोस शिबिराला प्रतिसाद
रत्नागिरी(सुनील धावडे ब्युरो चीफ युवा मराठा न्युज नेटवर्क): शहरातील अखिल चित्पावन ब्राह्मण विद्यार्थी सहाय्यक मंडळ, जिल्हा परिषद आरोग्य विभाग आयोजित कोरोना लसीकरण (बुस्टर डोस) शिबिराला जोशी पाळंद परिसरासह स्थानिक मंडळींचा उत्स्फूर्त प्रतिसाद लाभला. चित्पावन मंडळाच्या (कै.) ल. वि. केळकर वसतीगृहाच्या सभागृहात हे शिबिर आज सकाळी १० ते दुपारी ३ या वेळेत आयोजित केले होते. या वेळी बुस्टर डोससह दुसरा डोस १६८ जणांनी घेतला. कोव्हिशिल्ड आणि कोव्हॅक्सिन या दोन्ही लसी मुबलक प्रमाणात उपलब्ध करून दिल्या. दीपप्रज्वलनाने शिबिराला सुरुवात झाली. यामध्ये तीन परिचारिकांनी लसीकरण केले. त्यांचे स्वागत स्थानिक नगरसेविका सौ. सुप्रिया रसाळ यांनी केले. या वेळी चित्पावन मंडळाचे कार्यवाह राजन पटवर्धन, भाजपा कामगार आघाडी शहराध्यक्ष संदीप रसाळ, शेखर लेले, रविकांत शहाणे, मोहन पटवर्धन, सुधाकर वैद्य यांच्यासमवेत मंडळाचे पदाधिकारी, सदस्य उपस्थित होते. ल. वि. केळकर वसतीगृहामधील विद्यार्थ्यांनीही शिबिराकरिता मदत केली.
