आशाताई बच्छाव
(भिला आहेर ता.प्र.युवा मराठा न्युज नेटवर्क)
देवळा प्रतिनिधी:-इयत्ता दहावी बोर्डाच्या परीक्षेचा निकाल नुकताच जाहीर झाला असून देवळा तालुक्यातील वाजगाव आश्रम शाळेतील नेहा संतोष इंद्रेकर ह्या विद्यार्थीनीने ८७.५८ टक्के गुण मिळवत घवघवीत यश संपादन केले आहे. विशेष म्हणजे नेहाचे आई-वडील हयात नसतांना अनाथ आणि अतिशय गरीब कुटुंबातील व भटक्या जमातीतील कंजारभाट समाजातील ह्या मुलीने परिस्थितीवर मात करत हे यश संपादन केले आहे. विशेष करून नेहा ही नेहमी आजारी असल्यामुळे ती शाळेत देखील वेळेवर जाऊ शकत नव्हती आणि शारीरिक व्याधीमूळे ती तीन तासाचा पेपर फक्त दोन तासातच पूर्ण करत होती. अनाथ तसेच स्वतःची शेती तर सोडाच पण राहण्यासाठी घराला जागाही स्वतःच्या मालकीची नसतांना व शारीरिक व्याधी असतांना पूर्ण दिवस कुठे कामही करू शकत नाही अशा परिस्थितीत एका खासगी दवाखान्यात ती साफसफाईचे काम करत मिळणाऱ्या पैशातून ती आपल्या शारीरिक व्याधीवर उपचारासाठी खर्च करत तिने ह्या आश्रमशाळेत द्वितीय क्रमांक मिळवला . मूळची वणी येथील असलेल्या नेहाला दोन बहिणी आणि एक भाऊ असा परिवार तिच्या सोबत आहे . तसेच तिला खास करून तिच्या काकांचा मुलगा व पत्रकार सतीश इंद्रेकर हे वेळोवेळी सर्वच प्रकारची मदत करत असतात जिद्द आणि चिकाटीच्या जोरावर नेहाने जे यश संपादन केले आहे तिचे सर्वत्र कौतुक होत आहे.