आशाताई बच्छाव
साईनगर तांड्याची सून गोकर्णा राठोड देश सेवेसाठी सीआरपीएफ मध्ये
शत्रुघ्न काकडे पाटील (युवा मराठा न्युज नेटवर्क ब्युरो चीफ)
(परभणी)जिंतूर :-तालुक्यातील साईनगर तांड्यावरील सून गोकर्णा सचिन राठोड देशसेवेसाठी सीआरपीएफ मध्ये निवड झाली असून ११ महिन्याच्या प्रशिक्षण कालावधी पूर्ण करून आज मंगळवारी ती साईनगर तांड्यात दाखल झाली. यावेळी गावकऱ्यांच्या व नातेवाइकाकडून जल्लोषात स्वागत करण्यात आले. फटाक्याची आतषबाजी व डिजेच्या तालावर नाचत गाजत गावातून तांड्या पर्यंत मिरवणूक काढण्यात आली. अतिशय आनंदी वातावरणामध्ये गावकऱ्यांच्या डोळ्यात आनंदाश्रू वाहताना दिसून आले.
या बाबतची अधिक माहिती अशी की गोकर्णा परमेश्वर चव्हाण रा. वडचुना ता. औंढा जि. हिंगोली येथील असून, काही वर्षांपूर्वीच तिचा विवाह जिंतूर तालुक्यातील साईनगर तांडा येथील सचिन प्रकाश राठोड यांच्याशी विवाह झाला. लग्न झाल्या नंतर सासरी आलेल्या गोकर्णाने आपल्या शिक्षणाचा हट्ट सासू-सासरे यांच्या कडे धरला आणि सासू-सासऱ्यांनी क्षणाचा ही विचार न करता गोकर्णा यांना शिक्षणाची परवानगी दिली व आढोळ येथील उच्च माध्यमिक शाळेमध्ये प्रवेश करून दिला. सासू-सासऱ्यांची गरीब परिस्थिती आणि त्यांनी ठेवलेला विश्वास हे सार्थ करण्यासाठी पुढे बारावीची परीक्षा दिली व त्यामध्ये चांगल्या गुणांनी पास झाली. मना मध्ये देश सेवा करण्याची जिद्द असल्याने शेता मध्ये काम करत करत आपल्या अभ्यास सुरूच ठेवला.
विशेष बाब म्हणजे गोकर्णा सचिन राठोड हिला एक तीन वर्षांचे चिमुकले बाळ आहे. गोकर्णा ही आपल्या घरी आल्यावर तिने मी सर्वप्रथम सासू-सासऱ्यांना सॅल्यूट करून सासऱ्यांच्या डोक्यावर आपल्या डोक्यातील मानची वर्दी घातली. हा क्षण खूपच भावुक असल्याने उपस्थित नातेवाइ व गांवकरी यांच्या डोळ्यामध्ये आनंदाश्रू आले. यावेळी गोकर्णा यांच्या स्वागतासाठी गोर सेनेचे अध्यक्ष तथा उपसरपंच विजय आढे, प्रकाश राठोड, अमोल जाधव, हरिदास राठोड, विनोद राठोड, विकास राठोड, कोंडीराम जाधव, बबन चव्हाण, राजू राठोड, गणेश चव्हाण, सचिन राठोड, अविनाश आढे, पंढरीनाथ जाधव, भालचंद्र राठोड सह गावातील नागरिकांची व महिलांची मोठ्या संख्येने उपस्थित होती.