आशाताई बच्छाव
वडनेर खाकुर्डी पोलिस स्टेशनची स्थापना का?आणि कुणासाठी? वाचा युवा मराठा चा स्पेशल रिपोर्ट!
(राजेंद्र पाटील राऊत युवा मराठा न्युज नेटवर्क)
मालेगांव-महाराष्ट्रातल्या नाशिक जिल्ह्यातल्या मालेगाव तालुक्यात असलेल्या वडनेर खाकुर्डी पोलिस स्टेशनची स्थापना का?आणि कुणासाठी झाली? हे एक मोठ्ठेच रहस्य आहे!
त्याची खरी माहिती आजही कित्येकांना नाहीये.तसं बघितल तर मालेगांव तालुक्यात एकूण एकशे चाळीस गावाचा समावेश होतो,संपूर्ण तालुक्यात बहुतेक ठिकाणी औट पोस्ट म्हणून पोलिसांच्या चौक्या कार्यरत आहेत…तर काही ठिकाणी फक्त आता नावालाच औट पोस्ट उरले आहेत.असे असतानाही फक्त वडनेर खाकुर्डीतच स्वतंत्र पोलिस स्टेशनची स्थापना का? व कशासाठी? असा प्रश्न साहजिकच निर्माण होतो.
अगदी ब्रिटीश काळात स्थापन झालेले हे पोलिस स्टेशन आजही मोसम नदीकाठावर मोठया दिमाखात उभे आहे.काटवन परिसर म्हणून ओळखला जाणारा हा वडनेर खाकुर्डीचा भाग पुर्वी घनदाट अशा जंगलाने व्यापलेला होता.याच परिसरातल्या खाकुर्डी गावात गुलब्या फराडी नावाचा मोठा दरोडेखोर नावारुपास आलेला होता.गुलब्या फराडी हा नावालाच दरोडेखोर होता.श्रीमंत व सावकार लोकांना लुटून तो लुटलेला ऐवज गोरगरिबांना वाटत होता,म्हणून तो गरिबांचा मसिहा देवता म्हणून ओळखला जात होता.भिल्ल समाजात जन्माला आलेल्या या गुलब्या फराडीने ब्रिटिशकालीन पोलिसांची अक्षरशः झोप उडविली होती.पुर्वीच्या काळी आजच्या सारख्या सोयी सुविधा नव्हत्या आरोपीला पकडायला जाताना पोलिसांना घोडयावरुन जावे लागत होते.गुलब्या फराडीचा शोध तपास घेऊनही ज्यावेळेस गुलब्या फराडी सापडत नाही.असे दिसून आल्यावर ब्रिटिश पोलिसांनी वडनेर खाकुर्डी येथे स्वतंत्र पोलिस स्टेशनची स्थापना केली.सहाय्यक पोलिस निरिक्षक A.P.I दर्जाचे असलेले हे पोलिस स्टेशन अखेरच्या क्षणापर्यत गुलब्या फराडीला पकडू शकले नाही असे आजही त्या भागातले लोक सांगतात.
मात्र नंतरच्या काळात याच पोलिस स्टेशनने महाराष्ट्राला अनेक नावलौकिक प्राप्त अधिकारी दिलेत.२६/११ च्या मुंबई ताज अतिरेकी हल्ल्यातील शहीद अशोक कामटे यांनी आपल्या नोकरीची सुरुवात याच वडनेर खाकुर्डी पोलिस स्टेशनला ए.पी.आय.या पदापासून केलेली होती.नंतरच्या काळात सुभाष नेवे,नरेंद्र पिंगळे,रखमाजी उकीर्ड,कृष्णा सोनी,संदीपकुमार बोरसे,राऊत,रामेश्वर मोताळे ,देवेंन्द्र शिंदे सारख्या अधिकाऱ्यांनी आपली सेवा चोख बजावली आहे.
