राजेंद्र पाटील राऊत
शॉकिंग! थंडीने तोडले सर्व विक्रम!! बुलडाण्यात पारा ९ डिग्रीच्या खाली; हजारो बुलडाणेकर गारठले, लहान मोठे दवाखाने हाऊस फुल्ल. (ब्युरो चीफ स्वप्निल देशमुख युवा मराठा न्यूज बुलडाणा) उत्तर भारतात सातत्याने होणारी हिमवर्षा आणि त्यामुळे निर्माण झालेली धोकादायक शीतलहर यामुळे जिल्हा मुख्यालय असलेले बुलडाणा शहर मागील दोन आठवड्यांपासून अक्षरशः गारठले आहे. यामुळे तापमानात भीषण घट झाली असून, आज, २७ जानेवारीला या थंडीने ऑलटाइम ग्रेट असा ८.८ डिग्री सेल्सिअसचा आकडा गाठत हजारो बुलडाणेकरांना अक्षरशः हादरवले!
यंदाचा हिवाळा प्रामुख्याने डिसेंबर मध्यापासूनचा कालावधी बुलडाणा परिसर वासियांची शीत परीक्षा घेणारा ठरला आहे. डिसेंबरच्या दुसऱ्या पंधरवड्यात तापमापकाचा पारा सतत १३ ते १५ डिग्री सेल्सिअसच्या दरम्यान रेंगाळत राहिला. मात्र जानेवारी महिन्याने आजवर रोजच कठोर परीक्षा घेतली, असे म्हटल्यास ती अतिशयोक्ती ठरणार नाही.
चालू महिन्याच्या उत्तरार्धात थंडीने कहर माजवला! प्रजासत्ताक दिन व त्या आधीच्या दिवशी अर्थात २५ व २६ जानेवारीला तापमापकाचा पारा ९.२ डिग्रीवर स्थिरावला. थंडीत आणखी घट होईल हा नुसत्या कल्पनेनेच गारठवणारा अंदाज आज २७ जानेवारीला खरा ठरला!
आज बुलडाणा परिसरात किमान तापमान ८.८ डिग्री सेल्सिअसवर पोहोचले. ठीक याच्या विरुद्ध कमाल तापमान २५.४ डिग्री इतके नोंदविण्यात आले. परिणामी आज बुलडाणा शहर व परिसरातील लाखावर आबालवृद्ध हैराण परेशान झाल्याचे दिसून आले. यामुळे दमा, श्वसन रोग व गंभीर आजार असणाऱ्या वृद्धांचा त्रास वाढला असून, घराघरात सर्दी, पडसे, खोकला आणि तापाचे रुग्ण आढळून येत आहे. यामुळे लहान ,मध्यम दवाखाने, मेडिकल स्टोअर्स रुग्णांनी गजबजल्याचे दिसून येत आहे.
