राजेंद्र पाटील राऊत
कागल तालुक्यातील महीलेचा सँनिटायझर स्फोटात मृत्यू
कोल्हापूर जिल्ह्यातील बोरवडे ( तालुका कागल) येथील
सौ. सुनीता धोंडिराम काशिद वय ४० ह्या घरातील केरकचरा पेटवताना कचर्‍यात असणार्‍या सॅनिटायझर बाटलीचा स्फोट होऊन गंभीर जखमी होऊन शनिवारी रात्री उशिरा छत्रपती प्रमिलाराजे शासकीय रुग्णालयामधे मृत्यू झाला.
चार दिवसांपूर्वी सुनीता काशिद घराची झाडलोट झाल्यानंतर सर्व कचरा घराच्या बाहेर मोकळ्या जागेत पेटवत असताना या कचर्‍यात सॅनिटायझरची बाटलीही होती. कचरा पेटविल्यानंतर अचानक बाटलीचा स्फोट होऊन त्यातील काही सॅनिटायझर सुनिता काशिद यांच्या अंगावर उडाले, त्यामुळे कपड्यांनी पेट घेतला. यामध्ये त्या ८० ते ९० टक्के भाजल्या होत्या.
त्यांना तातडीने सी.पी.आर. रुग्णालयात दाखल केले होते. उपचार सुरू असतानाच शनिवारी रात्री त्यांचा मृत्यू झाला. त्यांच्या मागे पती, मुलगा व मुलगी असा परिवार आहे. या घटनेमुळे बोरवडे परिसरात हळहळ व्यक्‍त होत आहे. सौ. सुनीता यांचे पती धोंडिराम काशिद ग्रामसेवक आहेत.
कोरोना महामारीमुळे प्रत्येक घरात सुरक्षा म्हणून सॅनिटायझर आणले जाते. घरातील मोठ्यांबरोबरच लहान मुलेही सॅनिटायझरची बाटली हाताळत असतात. शाळांतील दप्‍तरात सॅनिटायझर बाटली आढळून येते. त्यामुळे न कळत त्यांच्या हातून ही बाटली गहाळ होऊन ती कचर्‍यात जमा होण्याची शक्यता असते. सॅनिटायझर हे ज्वलनशील असल्यामुळे अशा घटना घडण्याची शक्यता आहे. त्यामुळे प्रत्येकाने काळजी घेण्याची अत्यंत गरज आहे.
युवा मराठा न्यूज नेटवर्क .
