*सी.पी.आर.रूग्णालयात होणार नाँन* *कोरोना रूग्णसेवा*
*युवा मराठा न्यूज*
कोल्हापूर जिल्ह्यात गेले सात महिने सी.पी.आर. रुग्णालय कोरोनाबाधित रुग्णांच्या सेवेत आहे. जिल्ह्यातील कोरोना विषाणूचा प्रादुर्भाव कमी झाला असून रुग्णसंख्येत घट झाली आहे. टप्प्याटप्प्याने सी.पी.आर. रुग्णालयाचे विभाग नॉन कोरोना रुग्णांसाठी सुरू करा, अशी सूचना वैद्यकीय शिक्षण व संशोधन संचालक यांनी व्हिडीओ कॉन्फरन्सद्वारे केली आहे. सी.पी.आर. प्रशासनाने नॉन कोरोनाबाधित रुग्णसेवा सुरू करण्यासाठी तयारी सुरू केली आहे. आठवडाभरात सी.पी.आर.मध्ये नॉन कोरोना रुग्णांवर उपचार सुरू केले जाणार आहेत.
सी.पी.आर. मधील सर्व विभाग सध्या बंद असून येथील वॉर्डमध्ये फक्त कोरोनाबाधित रुग्णांवर उपचार सुरू आहेत.
नॉन कोरोना रुग्णांसाठी कसबा बावडा येथील रुग्णालय सेवेत आहे. येथे प्राथमिक तपासणी करून रुग्णांना शहरातील अन्य खासगी रुग्णालयात पुढील उपचारासाठी पाठविले जात आहे. लवकरच ही फरफट थांबणार आहे. कारण सी.पी.आर. नॉन कोरोना रुग्णसेवेत येणार आहे.
सी.पी.आर.मधील दूधगंगा इमारत कोरोनाबाधित रुग्णांसाठी राखीव ठेवली जाणार आहे. सध्या सी.पी.आर.च्या अन्य इमारतीमध्ये उपचार घेणार्या बाधित रुग्णांचे स्थलांतर दूधगंगा इमारतीमध्ये केले जाणार आहे. अन्य उर्वरित इमारतीमध्ये टप्प्याटप्प्याने नॉन कोरोना रुग्णांवर उपचार सुरू केले जाणार आहेत. त्यासाठी युद्धपातळीवर यंत्रणा गतिमान झाली आहे. त्याच्या नियोजनासाठी समिती स्थापन केली आहे. यामध्ये औषधवैद्यकशास्त्र विभागप्रमुख, वैद्यकीय अधीक्षक, सर्व पथकप्रमुख, अधिसेविका यांचा समावेश आहे. सोमवारी (दि. 2) या समितीच्या पुढील नियोजनाबाबत बैठकीचे आयोजन केले आहे.
अधिष्ठाता डॉ. चंद्रकांत मस्के यांनी वैद्यकीय शिक्षण व संशोधन संचालकांच्या सूचनेनुसार कार्यालयीन आदेश काढला आहे. कोरोना रुग्णसंख्येचा आढावा घेऊन रुग्णालयातील दूधगंगा इमारतीमध्ये अन्य वॉर्डमधील रुग्ण स्थलांतरित करावेत. रुग्ण स्थलांतरित करताना रुग्णांच्या जीवितास धोका निर्माण होणार नाही, याची विशेष खबरदारी घ्यावी. रिकाम्या होणार्या इमारती, वॉर्ड, उपकरणांसह अन्य यंत्रसामग्री निर्जंतुकीकरण करून घ्यावे. सूक्ष्मजीवशास्त्र विभागाकडून निर्जंतुकीकरण योग्य प्रकारे झाले असल्याची खात्री करून घ्यावी. त्यानंतर नॉन कोरोना रुग्णसेवा सुरू करावी, असे आदेशात म्हटले आहे.
मोहन शिंदे जिल्हाप्रतिनिधी
कोल्हापूर .