आशाताई बच्छाव
वानखेड: नवरात्रोत्सवात भाविकांची धामधूम
साडेतीन शक्तिपीठांपैकी एक जगदंबा देवी संस्थानात उत्साहवर्धक कार्यक्रम
✍🏻 स्वप्निल देशमुख
वानखेड – वान नदीच्या तीरावर वसलेले आणि साडेतीन शक्तिपीठांपैकी एक म्हणून ओळखले जाणारे जगदंबा देवी संस्थान नवरात्रोत्सवाच्या पार्श्वभूमीवर भक्तांमध्ये उत्साहाचं वातावरण निर्माण करत आहे. विश्वस्त मंडळाच्या पुढाकाराने विविध धार्मिक व सांस्कृतिक कार्यक्रमांचे आयोजन करण्यात आले असून, घटस्थापनेपासूनच मंदिरात भाविकांची मोठी गर्दी दिसून येत आहे.
उंच टेकडीवर वसलेल्या राऊळी मंदिरात विराजमान जगदंबा माता वर्षभर भाविकांच्या श्रद्धास्थानी राहतात. विशेषतः नवरात्रोत्सवाच्या काळात येथे सर्वाधिक भक्तांची मांदियाळी होते. यंदा २२ सप्टेंबरपासून सुरू झालेल्या उत्सवाला उत्स्फूर्त प्रतिसाद मिळत असून, दररोज भाविकांची लाट उसळत आहे.
भक्तांच्या सोयीसाठी संस्थानच्या वतीने दर्शन व्यवस्थापन, पाणी व इतर सुविधा उपलब्ध करून देण्यात आल्या आहेत. आगामी मंगळवारी उत्सवाची सांगता होणार असून, त्यानिमित्त मंदिर परिसर सजवण्यात आला आहे.
दरवर्षी दोन मोठे उत्सव – पौष पौर्णिमेची यात्रा आणि नवरात्रोत्सव – या मंदिराच्या वतीने साजरे केले जातात. यंदा नवरात्रोत्सवानिमित्त मंदिर परिसर फुलांची व विद्युत सजावट करून भक्तांना अलौकिक अनुभव देण्यात येत आहे.
नवरात्रोत्सवाच्या अखेरीस, ३० सप्टेंबर रोजी विशेष पूजा, होमहवन आणि आरती यांच्यात उत्सवाची सांगता होणार आहे. या दिवशी मंदिर परिसर भक्तिमय वातावरणाने न्हालेल्या असेल, अशी अपेक्षा आहे.
यावेळी वानखेड गावातील स्वयंसेवी मंडळांकडून भाविकांसाठी फराळ, पाण्याची मोफत सोय करण्यात आली आहे. तसेच, कोणत्याही अडचणी येऊ नयेत, यासाठी विविध आवश्यक सुविधा पुरवण्यात येत आहेत.
