तारुखेडले येथे आजपासून मुळ मुक्ताई माता यात्रोत्सव

आशाताई बच्छाव

तारुखेडले येथे आजपासून मुळ मुक्ताई माता यात्रोत्सव

दैनिक युवा मराठा
रामभाऊ आवारे निफाड

निफाड तालुक्यातील तारुखेडले येथील मुळ मुकाई माता यात्रोत्सव आज शनिवारपासून सुरू होत आहे. यात्रोत्सवाची तयारी पूर्ण झाली असल्याची माहिती यात्रा समितीने दिली आहे.यात्रोत्सवानिमित्त विविध धार्मिक व करमणुकीच्या कार्यक्रमाचे आयोजन करण्यात आले आहे. शनिवारी सकाळी 8 वाजता मुळ मुकाई माता मंदिरात अभिषेक व पूजा आरती होणार आहे. सायंकाळी 4 ते 7 वाजता गावातून मुळ मुकाई माता प्रतिमेची सजवलेल्या रथातून सवाद्य मिरवणूक काढण्यात येणार आहे. यावेळी शोभेच्या दारूची आतषबाजी करण्यात येणार आहे. रात्री करमणुकीसाठी विठाभाऊ मांग नारायणगावकर तमाशा मंडळ यांचा लोकनाट्य तमाशा मंडळाचा कार्यक्रम होणार आहे. रविवारी संध्याकाळी 9 ते 12 पांडुरंग मुळे यांचा लोक नाट्य तमाशा होईल दिवसभर ग्रामस्थ
मुळ मुकाई माता मंदिरात सत्यनारायण पूजा करतात. दुपारी कुस्त्यांची दंगल होणार आहे. यात 101 ते 1001 रुपयांचे बक्षीस देऊन यशस्वी मल्लांना गौरविण्यात येणार आहे. यात्रेनिमिताने मंदिराला रंगरंगोटी
करण्यात आली असून, मंदिर परिसरात स्वच्छता अभियान राबविण्यात आले आहे. मंदिरावर आकर्षक विद्युत रोषणाई करण्यात आली असून, परिसर विद्युत रोषणाईने उजळून निघाला आहे. यात्रेनिमित्ताने विविध खेळणी, मेवा मिठाई, रहाट पाळणे आदी दुकाने थाटण्यास सुरुवात झाली आहे. दोन दिवस सुरू राहणाऱ्या यात्रेची ग्रामस्थ व यात्रा उत्सव समितीच्या वतीने जय्यत तयारी करण्यात आली आहे. परिसरातील भाविकांनी यात्रोत्सवातील विविध धार्मिक कार्यक्रमांचा लाभ घ्यावा, असे आवाहन यात्रा उत्सव समितीच्या वतीने करण्यात आले आहे.