आशाताई बच्छाव
जैन मंदिरासमोरचा रस्ता खासगी व्यक्तीच्या नावावर ; नेवासे तालुक्यातल्या सोनईतला धक्कादायक प्रकार ; सर्वच संबंधितांविरुद्ध फौजदारी गुन्हे दाखल करा ; संतप्त व्यापारी बांधवांची मागणी. नेवासा ,( कारभारी गव्हाणे तालुका प्रतिनिधी)
गेल्या अनेक वर्षांपासून ज्या रस्त्याच्या काँक्रिटीकरणासाठी सरकारी तिजोरीतून लाखो रुपयांचा निधी मंजूर होऊन काँक्रिटीकरणाची कामं करण्यात आली आणि महाराष्ट्र शासनाच्या मालकीचा असलेला रस्ता चक्क खासगी व्यक्तीच्या नावावर करण्यात आल्याचा धक्कादायक प्रकार समोर आला आहे. नेवासे तालुक्यातल्या सोनईतला हा प्रकार असून यासाठी जबाबदार असलेल्या ग्रामसेवकासह सिटी सर्वे कार्यालयातल्या अधिकाऱ्यांविरुद्ध फौजदारी गुन्हे दाखल करा, अशी मागणी सोनईतल्या संतप्त व्यापारी बांधवांमधून केली जात आहे.
विशेष म्हणजे ज्या सोनई ग्रामपंचायतीच्या कार्यालयात हा ठराव करण्यात आला, त्या ठरावावर सोनईच्या सरपंचाची सहीच नसल्याचं व्यापारी बांधवांनी सांगितलंय.
जोपर्यंत हा वाद मिटणार नाही, तोपर्यंत अन्न त्याग उपोषण करण्याचा इशारा सोनईच्या संतप्त व्यापारी बांधवांनी दिलाय.
दरम्यान, व्यापारी बांधवांच्या या उपोषणाला विविध संघटनांनी पाठिंबा दर्शविला आहे. सरपंच पदावर विराजमान झालेल्या व्यक्तीलाच हा प्रकार माहिती नाही. हे असं राजरोसपणे व्हायला लागलं, तर सामान्य माणसाचं काय होणार, असा प्रश्न यानिमित्तानं उपस्थित केला जात आहे
