आशाताई बच्छाव
टोम्पे महाविद्यालयात राष्ट्रीय सेवा योजना दिवस उत्साहात साजरा
मयुर खापरे चादुंर बाजार
चांदूरबाजार येथील गो. सी. टोम्पे कला, वाणिज्य व विज्ञान महाविद्यालयात राष्ट्रीय सेवा योजनेच्या वतीने राष्ट्रीय सेवा योजना दिवस व सत्यशोधक समाज शतकोत्तर सुवर्णमहोत्सव कार्यक्रमाचे आयोजन करण्यात आले होते. यावेळी मंचावर कार्यक्रमाचे अध्यक्ष म्हणून महाविद्यालयाचे प्राचार्य डॉ. राजेंद्र रामटेके, डॉ. नंदकिशोर गव्हाळे, डॉ. लालबा दुमटकर, डॉ. युगंधरा गुल्हाने, डॉ. श्रीकृष्ण उबरहंडे, डॉ. उमेश कनेरकर, डॉ. तुषार नाकाडे, डॉ. प्रिया देवळे, डॉ. निधी दीक्षित प्रामुख्याने उपस्थित होते. यावेळी आपल्या प्रास्ताविकपर भाषणातून डॉ. लालबा दुमटकर यांनी कार्यक्रम आयोजनामागची भूमिका सविस्तर मांडले तर कार्यक्रमाचे अध्यक्ष महाविद्यालयाचे प्राचार्य डॉ. राजेंद्र रामटेके यांनी विद्यार्थ्यांना मार्गदर्शन करताना म्हणाले, राष्ट्रीय सेवा योजना दिवस हा कार्यक्रम केंद्रीय मंत्रालयाचा असून महात्मा गांधी यांच्या जन्मशताब्दी निमित्त साजरा करण्यात येतो. राष्ट्रीय सेवा योजनेच्या माध्यमातून विद्यार्थ्यांमध्ये शिक्षणाबरोबरच सामाजिक जाणीव निर्माण करणे हा उद्देश असून आपत्ती व्यवस्थापन, पर्यावरण, वृक्षारोपण, स्वच्छता, देशभक्ती इत्यादी गुण रुजवणे हा या कार्यक्रमाचा हेतू असल्याचे मत मांडले तसेच महात्मा ज्योतिबा फुले यांच्या सत्यशोधक समाज स्थापनेस 150 वर्ष पूर्ण झाल्यामुळे महात्मा फुले यांच्या कार्यावरही प्रकाश टाकला. या कार्यक्रमाचे सूत्रसंचालन व आभार राष्ट्रीय सेवा योजनेचे महिला कार्यक्रमाधिकारी डॉ. युगंधरा गुल्हाने यांनी केले. सदर कार्यक्रमाला महाविद्यालयातील विद्यार्थी, प्राध्यापक व शिक्षकेतर कर्मचारी बहुसंख्येने उपस्थित होते.
