आशाताई बच्छाव
पंढरपूर देवस्थानच्या स्वच्छतेकडे तात्काळ लक्ष घालण्याची गरज
मुंबई हायकोर्ट वकील ॲड प्रकाश पाटील (खेरवाडी) यांचे पंढरपूर देवस्थान कार्यकारी अधिकाऱ्यांना पत्र-
दैनिक युवा मराठा
निफाड (रामभाऊ आवारे)
पांडुरंग परमात्म्याच्या पवित्र पावन पंढरपूर भूमीमध्ये लाखो भाविकांचे श्रद्धास्थान असलेले तीर्थक्षेत्र पंढरपूर येथील चंद्रभागा तीरावरील पुंडलिक मंदिर परिसर व विठ्ठल रुक्मिणी मंदिर परिसरात वाढलेल्या घाणीच्या साम्राज्याकडे पंढरपूर देवस्थान समितीने लक्ष देऊन परिसराची स्वच्छता करण्याविषयीचे पत्र नीलांजनम बहुउद्देशीय ट्रस्ट खेरवाडी ता. निफाड चे अध्यक्ष तथा मुंबई हायकोर्टाचे वकील ॲड प्रकाश देवचंद पाटील यांनी नुकतेच विठ्ठल रुक्मिणी देवस्थान पंढरपूरचे मुख्य कार्यकारी अधिकारी यांना दिले.
सदर पत्रात त्यांनी म्हटले आहे की, मागील महिन्यात पाटील यांनी ट्रस्टच्या वतीने ५० भाविकांना घडविलेल्या मोफत पंढरपूर- तुळजापूर यात्रा दरम्यानच्या काळात दुपारच्या वेळेस चंद्रभागेत स्नानासाठी गेले असता ४० ते ५० म्हशींना धुण्याचे काम सुरू असल्याने नदीतील पाणी शेणामुळे अतिशय गढूळ पाणी होते. तसेच किनाऱ्यावरती शेण ,कचरा प्लास्टिक अस्तव्यस्त पडल्याने व म्हशींचे मोकाट उदळणे सुरू असल्याने भाविकांना घाबरून वस्त्रांतरासाठी दूरवर जावे लागते. तसेच विठ्ठल रुक्मिणी मंदिर परिसर, दर्शन रांग, स्नान परिसर व विशेषता चंद्रभागा तीरावरील पुंडलिक मंदिर परिसरात प्रचंड घाणीचे साम्राज्य पसरले असल्याने साथीच्या रोगाचा प्रादुर्भाव वाढून लाखोंच्या संख्येने येणाऱ्या भाविकांचे आरोग्य धोक्यात येऊ शकते असे त्यांनी पत्रात कथित केले आहे. या पत्राची माहितीसाठी प्रत मुख्यमंत्री शिंदे, उपमुख्यमंत्री देवेंद्र फडणवीस, जिल्हाधिकारी सोलापूर, मुख्य जिल्हा न्यायाधीश सोलापूर, आदींना पाठविले आहे. तरी या पत्राची दखल घेऊन स्थानिक प्रशासन व देवस्थान समितीने कायमस्वरूपी स्वच्छता ठेवण्याची विनंती पाटील यांनी केली आहे.
