कोल्हापूर जिल्ह्यातील बहिरेवाडी ता.आजरा येथील जवान ऋषिकेश जोंधळे शुक्रवार दि.१३ रोजी दुपारी पाकिस्तानने केलेल्या भ्याड हल्ल्यामध्ये शहीद झाले. त्यांचे पार्थिव रविवार दुपारपर्यंत बहिरेवाडीत येणार होते. पण जम्मू-काश्मीरमध्ये पडत असणाऱ्या बर्फवृष्टीमुळे व पार्थिव उशिरा ताब्यात मिळाल्याने ते उद्या सोमवार दि. १६ रोजी सकाळी ७ वाजता बहिरेवाडी येथे येणार आहे.
सकाळी ७ ते ७.३० कुटुंबीयासाठी दर्शनासाठी, त्यानंतर गावातून अंत्ययात्रा काढण्यात येणार आहे. प्रमुख अतिथींच्या हस्ते पुष्पहार अर्पण करण्यात येणार आहे. मान्यवराचे शोकसंदेशपर भाषण, ध्वजप्रदान कार्यक्रम, मानवंदना देऊन अंत्यसंस्कार करण्यात येणार आहेत.
बहिरेवाडी येथील शाळेच्या पटांगणामध्ये शहीद जोंधळे यांच्या पार्थिवावर अंत्यसंस्कारासाठी चबुतरा बांधण्यात आला आहे. सोशल डिस्टंसिंग राखून बसण्याची व्यवस्था करण्यात आली आहे. पार्थिव ठेवण्यासाठी स्वतंत्र मंडपाची व्यवस्था करण्यात आली आहे. या ठिकाणी सी.आर. एफ (सायरन रिस्की फोर्स ) कमांडो, व्हाईट आर्मीचे स्वयंसेवक गावातील विविध मंडळाचे कार्यकर्ते, पोलिस अधिकारी व उपविभागीय पोलिस अधिकारी गणेश इंगळे हे नियोजन करणार आहेत. सकाळी ७ ते १० दरम्यान हडलगे फाटा, चोथ्याची खोप, मुमेवाडी तिट्टा येथील वाहतूक मार्ग बदलण्यात येणार आहे. दरम्यान आज आमदार चंद्रकांत जाधव व खासदार धैर्यशील माने यांनी जोंधळे कुटुंबीयांची भेट घेऊन सांत्वन केले.
कोल्हापूर प्रतिनिधी युवा मराठा न्यूज नेटवर्क.
