आशाताई बच्छाव
गडचिरोली शहरातील धानोरा रोड व आरमोरी रोडवरील ट्रॅव्हल्स पॉईंटमुळे अपघाताचा धोका वाढला।
गडचिरोली, सुरज गुंडमवार ब्युरो चीफ: शहरातील धानोरा रोडवरील महिला रुग्णालयाच्या गेटजवळील ट्रॅव्हल्स पॉईंट तसेच आरमोरी रोडवरील पाण्याच्या टाकीसमोरील ट्रॅव्हल्स पॉईंट हे नागरिकांसाठी आणि रुग्णांसाठी गंभीर समस्येचे कारण ठरत आहेत. या ठिकाणी दररोज ट्रॅव्हल्स वाहनांचे अनियमितपणे उभे राहणे आणि प्रवाशांचे चढ–उतरण सुरू असल्याने परिसरात वाहतुकीची तीव्र कोंडी निर्माण होत आहे.
धानोरा रोडवरील महिला रुग्णालय परिसर हा नेहमीच रुग्ण आणि नागरिकांच्या वर्दळीने गजबजलेला असतो. त्यामुळे येथे उभ्या राहणाऱ्या ट्रॅव्हल्स वाहनांमुळे दुचाकीस्वार व वाहनचालकांना मोठा धोका निर्माण झाला आहे. नागरिकांच्या मते, काही चालक रस्त्याच्या मध्यभागीच प्रवासी थांबवून घेतात, ज्यामुळे वाहतुकीचा वेग खंडित होतो आणि कोणत्याही क्षणी गंभीर अपघात होण्याची शक्यता आहे.
स्थानिक नागरिकांनी प्रशासनाचे लक्ष वेधून घेतले असून, त्यांनी या सर्व ट्रॅव्हल्स पॉईंट्सवरील वाहनथांबे त्वरित हलवून स्वतंत्र ठिकाणी व्यवस्था करण्याची मागणी केली आहे.
वाहतूक विभाग व नगरपालिका प्रशासनाने या समस्येकडे तातडीने लक्ष देऊन गडचिरोली शहरातील नागरिकांच्या सुरक्षिततेसाठी आवश्यक ती ठोस पावले उचलावीत, अशी मागणी नागरिकांनी व्यक्त केली आहे.
