आशाताई बच्छाव
मंडळ अधिकाऱ्यांच्या त्रासाला कंटाळून सातेफळ येथील विधवा महिलेकडुन आत्मदहनाचा इशारा
जाफराबाद जालना प्रतिनिधी मुरलीधर डहाके
जाफराबाद तालुक्यातील सातेफळ येथील गट 383/1 मधून नियमात नसतांनाही कुंभारझरी मंडळाच्या मंडळ अधिकाऱ्यांकडून रस्ता देण्याची मागणी केली जात आहे. मात्र हा रस्ता नियमबाह्य असल्याचे सांगत विधवा महिलेने मंडळ विरोधात मानसिक त्रास दिल्या प्रकरणी मा जिल्हाधिकारी डॉ श्रीकृष्ण पांचाळ 18 मार्च लेखी निवेदनात आत्मदहनाचा इशारा दिला आहे.
या संदर्भात सातेफळ येथील सत्यभामा गजानन बनकर या विधवा महिलेने जिल्हाधिकारी व तहसीलदार यांना दिलेल्या निवेदनात म्हटले आहे की ,मौजे सातेफळ गट क्रमांक 383/1 मधील शेत जमिनीकरता पूर्व पश्चिम बांधाने रस्ता मोकळा करून देण्यासाठी जाफराबाद तहसीलदार यांचा आदेश पारीत असतांना गैरअर्जदार कुंभारझरी मंडळाचे मंडळ अधिकारी यांनी संबधित गैरअर्जदार शेतकरी यांच्याकडून आर्थिक देवाण घेवाण करून धमकावून ,दमदाटी करून माझ्या शेत जमिनीच्या मध्य भागातून रस्ता द्या अन्यथा बरे वाईट होईल असे धमकावत आहे.माझे सासू सासरे ,व पती वारले असून मी दोन चिमुकल्याचा रोजमजुरी करून उदरनिर्वाह भागवत आहे.यांचा फायदा गैरअर्जदार घेत असुन मला आत्महत्या करण्यास भाग पाडत असल्याचे संबधित महिलेने जिल्हाधिकारी ,तहसीलदार यांना दिलेल्या निवेदनात म्हटले आहे
