आशाताई बच्छाव
धावडे : अंगणवाड्यांना पंख्यांचे वाटप; श्री सिद्धिविनायक हॉस्पिटलचा स्तुत्य उपक्रम
धावडे (ता. शिंदखेडा) रमेश रामराजे प्रतिनिधी: उन्हाळ्याच्या दिवसात लहानग्यांना दिलासा मिळावा या उद्देशाने दोंडाईचा येथील सुप्रसिद्ध श्री सिद्धिविनायक हॉस्पिटलचे सर्वेसर्वा डॉ. दिलीप पाटील यांच्या वतीने धावडे येथील अंगणवाडी क्रमांक १, २ आणि ३ येथे पंख्यांचे वाटप करण्यात आले.
या कार्यक्रमासाठी गावाचे नवनिर्वाचित सरपंच जगदीश पाटील यांचे मोलाचे सहकार्य लाभले. . कार्यक्रमाची प्रस्तावना ईशी सर यांनी केली. यावेळी डॉ. दिलीप पाटील यांनी समाजासाठी काहीतरी करण्याची गरज अधोरेखित करत “आपण समाजाचे देणे लागतो आणि आपले कर्तव्य आपल्या परीने पार पाडले पाहिजे” असे विचार व्यक्त केले.
कार्यक्रमात डॉ. प्रमोद गिरासे, रमेश रामराजे, आनंदा पाटील, विजयसिंग गिरासे, नाना पिंपळे, सतपाल गिरासे यांच्यासह अनेक मान्यवर आणि ग्रामस्थ मोठ्या संख्येने उपस्थित होते.
ग्रामस्थांनी या स्तुत्य उपक्रमाचे मनःपूर्वक कौतुक केले. अंगणवाडीतील शिक्षक आणि पालकांनीही ही मदत लहान मुलांसाठी उपयुक्त ठरणार असल्याचे सांगितले. समाजातील प्रत्येकाने आपल्या परीने योगदान दिल्यास गावाच्या सर्वांगीण विकासाला हातभार लागेल, असे मत उपस्थितांनी व्यक्त केले.
