आशाताई बच्छाव
नामपूर येथे चोरीचे सत्र सुरूच…परिसर झालयं चोरट्यांना मोकळे रान…काकडगावला घरफोडीत लाखोंचा ऐवज लंपास
सतीश सावंत-विभागीय प्रतिनिधी : क. स. मा. दे.
नामपूर, ता. ६ : येथे गेल्या आठवड्यात झालेल्या धाडसी घरफोडीची घटना ताजी असताना काकडगाव (ता. बागलाण) येथील मालेगाव रस्त्यालगत श्रीराम वर्कशॉपसमोरील वंदना कोर यांच्या बंद दरवाजाचा कडीकोयंडा तोडून चोरट्यांनी प्रवेश करून सोन्या-चांदीच्या दागिन्यांसह रोख रक्कम असा सुमारे सव्वा लाख रुपयांचा ऐवज लुटून लंपास केल्याची घटना शुक्रवारी (ता. ५) घडली. गेल्या काही महिन्यांपासून सातत्याने होणाऱ्या घरफोडींमुळे नागरिकांमध्ये भीतीचे सावट आहे. अनेक चोऱ्यांचा तपास लागत नसून दिवसेंदिवस खाकीचा धाक कमी झाल्याने पोलिसांच्या कामकाजाविषयी संशय व्यक्त होत आहे. काकडगाव येथील वंदना कोर खासगी कामानिमित्त बाहेरगावी गेल्या होत्या. याचा फायदा घेत अज्ञात चोरट्यांनी दरवाजाचा कडीकोयंडा तोडून घरात प्रवेश केला. कपाटात ठेवलेले एक तोळा सोन्याचे दागिने, पन्नास हजार रुपये रोख, असा सुमारे सव्वा लाखांचा ऐवज चोरुन नेला. नामपूर परिसरात गेल्या काही दिवसांपासून धाडसी चोऱ्या होत असल्याने नागरिकांमध्ये भीतीचे वातावरण आहे. याप्रकरणी वंदना संजय कोर यांनी पोलिसात फिर्याद दिली आहे. पोलिसांनी घटनेचा पंचनामा केला असून जायखेड्याचे सहाय्यक पोलिस निरीक्षक पुरुषोत्तम शिरसाठ यांच्या मार्गदर्शनाखाली नाना पाटील तपास करीत आहे.
.या चोऱ्यांचा तपास कधी लागणार ?
मागील आठवड्यात टेंभे वरचे (ता. बागलाण) येथील प्राथमिक शिक्षिका सुनंदा मगर यांच्या बंगल्यात भरदिवसा झालेल्या धाडसी घरफोडीत सुमारे तीन लाखांचा ऐवज चोरट्यांनी लुटून नेला. चोरीचा प्रकार वंदना कोर यांचे जेठ यांच्या लक्षात आल्यानंतर त्यांनी दूरध्वनीद्वारे माहिती दिली. गेल्या काही महिन्यात सटाणा रस्त्यालगत धुळे पोलिस दलातील कर्मचारी भूषण पाटील, राजेंद्र कापडणीस यांच्या घरातील भाडेकरू रवींद्र वाणी, मृत प्राथमिक शिक्षक प्रशांत कापडणीस यांच्या घरी सुमारे दोन लाख रुपयांची धाडसी चोरी झाली होती. चोरीच्या गुह्यांचा तपास लागत नसल्याने नागरिकांनी नाराजी व्यक्त केली आहे. जायखेड़ा पोलिस ठाण्यात हद्दीत वारंवार होणाऱ्या चोऱ्यांच्या पार्श्वभूमीवर रात्रीची गस्त वाढवावी, अशी मागणी नागरिकांनी केली आहे शहरात कुणी अनोळखी व्यक्ती दिसल्यास पोलिसांशी संपर्क करावा, असे आवाहन पोलिस प्रशासनाने केले आहे.
