आशाताई बच्छाव
परळी तालुक्यातील धर्मापुरी जवळ भीषण अपघात; दोन मजुरांचा जागीच मृत्यू
मोहन चव्हाण
ब्युरो चीफ बीड जिल्हा
बीड/परळी दि १७ परळी तालुक्यातील धर्मापुरी गावाजवळ एक भीषण अपघाताची घटना घडली आहे. धर्मापुरीहुन भोजनकवाडीकडे विजेचे पोल घेऊन जाणारे ट्रॅक्टर पलटी झाल्याने दोन मजुरांचा जागीच मृत्यू झाला आहे. तर तिघे जण गंभीर जखमी झाले आहेत. अपघातातील मयत दोन्ही मजूर भोजनकवाडी येथील रहिवासी असून ही दुर्घटना मंगळवारी दिनांक १६ एप्रिल २०२४ रोजी रात्री ०८:३० वाजताच्या सुमारास घडली. या घटनेमुळे भोजनकवाडी गावावर शोककळा पसरली आहे. या बाबत सविस्तर माहिती अशी की, मंगळवार दिनांक १६ एप्रिल रात्री ०८:३० वाजताच्या सुमारास धर्मापुरी येथुन विजेचे पोल घेऊन ट्रॅक्टर भोजनकवाडीकडे निघाले असता, धर्मापुरी जवळील फुलावर ट्रॅक्टर पलटी झाले. यात भोजनकवाडी येथील दोन्ही मजुरांचा जागीच मृत्यू झाला तर तिघेजण गंभीर जखमी झाले. प्रल्हाद वैजनाथ फड वय – ३४ वर्षे, भाऊसाहेब माणिक केदार वय – ३७ वर्षे अशी मयत झालेल्या मजुरांची नावे आहेत. या घटनेमुळे गावावर दुःखाचा डोंगर कोसळला असून परिसरामध्ये हळहळ व्यक्त करण्यात येत आहे. घटनेचा अधिक तपास परळी ग्रामीण पोलीस करत आहेत.
