आशाताई बच्छाव
परळी शहरातील मोकाट जनावरांचा नगर परिषदेने बंदोबस्त करावा- सामाजिक कार्यकर्ते अ‍ॅड.मनोज संकाये यांची मागणी
मोहन चव्हाण
ब्युरो चीफ बीड जिल्हा
बीड/परळी दि: ०८
शहरातील गर्दीच्या ठिकाणी तसेच सार्वजनिक ठिकाणी मोकाट जनावरे व गाढवांचा कुत्र्यांचा सुळसुळाट झाला असून या जनावरामुळे वाहतुकीस व्यत्यय येत आहे. तसेच रस्त्याच्या मध्यभागी बसलेली जनावरे कितीही हॉर्न वाजवला तरी रस्त्याच्या बाजूला सरकत नसल्यामुळे अनेकदा या मोकाट जनावरामुळे रस्त्यावरील वाहनाचे अपघात होत आहेत. यामुळे वाहनांचे मोठ्या प्रमाणात नुकसान तर होतेच परंतु नागरिकांना जीवित हानी होण्याची दाट शक्यता असते. दरम्यान परळी नगर परिषदेने मोकाट जनावरांचा बंदोबस्त करावा अशी मागणी सामाजिक कार्यकर्ते अ‍ॅड.मनोज संकाये यांनी केली आहे. परळी शहरातील मोंढा मार्केट, बस स्थानक, रेल्वे स्टेशन, उड्डाण पूल, छत्रपती शिवाजी महाराज चौक, राणी लक्ष्मीबाई टावर चौक, गणेशपार चौक, प्रभू वैद्यनाथ मंदिर परिसर सारख्या सार्वजनिक ठिकाणी रस्त्यावर मोकाट जनावरांनी मुक्काम मांडल्याचे दिसत असून यांच्यामुळे सर्वच लहान मोठ्या वाहन धारकांना अडथळा निर्माण होत आहे. तसेच मार्केट कमिटीच्या परिसरात पुन्हा मोठ्या प्रमाणात अतिक्रमणे वाढू लागली आहेत. तरी नगर पालिका प्रशासनाने मोकाट जनावरांचा व मोकाट गाढवांचा, कुत्र्यांचा बंदोबस्त करून त्यांना कोंडवाड्यात बंदिस्त करावे अशी मागणी अ‍ॅड.मनोज संकाये यांच्यासह असंख्य नागरिक, समाज सुधारक, पुढारी, कार्यकर्ते यांनी केली आहे.
