आशाताई बच्छाव
काळ्या काचा असणाऱ्या वाहनांवर दंडात्मक कार्यवाई: जिल्हाधिकारी
मोहन चव्हाण
ब्युरो चीफ बीड जिल्हा
बीड दि: २० काळया काचा असणाऱ्या चार चाकी वाहनांवर दंडत्मक कार्यवाई करा असे आदेश जिल्हाधिकारी दीपा मुधोळ/मुंडे यांनी पारित केल्याने आरटीओ कडुन कार्यवाही सुरू करण्यात आली असून आत्तापर्यंत ४५ वाहनांवर दंडात्मक कारवाई करण्यात आली आहे. आदर्श आचारसंहिता चालू असेपर्यंत ही कारवाई मोहीम सुरूच राहणार आहे. लोकसभा निवडणूक काळात काळ्या काचा असणाऱ्या वाहनातून दारू, हत्यारे, पैसे याची वाहतूक कोणी करू नये याकरिता जिल्हा प्रशासनाकडून सतर्कतेने कारवाई केली जात आहे. पहिल्या दिवशी काळ्या फिल्म लावलेल्या ४५ वाहनांच्या फिल्म काढून दंडात्मक कारवाई करण्यात आली आहे. या मोहिमेत बीड उपप्रादेशिक परिवहन अधिकाऱ्यांच्या पथकातील मोटार वाहन निरीक्षक पंकज यादव, सचिन जमखंडीकर, सहाय्यक मोटार वाहन निरीक्षक योगेश रबडे, पूजा खडकीकर, पवन गायके श्रीराम क्षीरसागर, प्रदीप बिराजदार, शशिकांत जाधव, महेश भोसले अशा आठ अधिकाऱ्यांचा समावेश होता. या पथकाने जालना रोडवरील बीड बायपास रस्त्यावर महालक्ष्मी चौकात काल मंगळवार दिनांक १९ मार्च रोजी सकाळ व संध्याकाळ दोन – दोन तास वाहनांची तपासणी करून चार तासात ४५ वाहनांवर दंडात्मक कारवाई केली. यामुळे जिल्हाधिकाऱ्यांच्या आदेशानंतर आरटीओ यंत्रणा सतर्क झाल्याचे पहायला मिळाले. ही यंत्रणा निवडणूक पूर्ण होईपर्यंत दररोज वाहनांची तपासणी करणार आहे.