आशाताई बच्छाव
शिवतीर्थावरील अतिषबाजीने वेधले लक्ष; आज सुप्रसिद्ध मराठी रॅपर मिटोराईड येणार
मोहन चव्हाण
ब्युरो चिफ बीड जिल्हा
बीड दि:१९ आज बीड येथील छत्रपती शिवाजी महाराज जयंती निमित्त माजी नगराध्यक्ष डॉ.दीपाताई शिरसागर, राष्ट्रवादी काँग्रेसचे विधानसभा अध्यक्ष डॉ. योगेश क्षीरसागर, कल्पतरूच्या सचिव डॉ. सारिकाताई क्षीरसागर यांनी महाराजांच्या प्रतिमेस पुष्पहार अर्पण करून अभिवादन केले. दरम्यान शिवजन्मउत्सवाचे स्वागत करत शिवतीर्थावर मध्यरात्री करण्यात आलेल्या अतिश बाजीने बीडकरांचे लक्ष वेधले. शहरातील छत्रपती शिवाजी महाराज चौकात शिवजयंती निमित्त सर्व शिवप्रेमी भगवे फेटे बांधून एकत्र आले. पुतळ्याच्या परिसरात ढोल ताशांच्या गजरात मिरवणूक काढण्यात आली. तसेच पारंपारिक ढोल, ताशे, तुतारींच्या गगनभेदी गर्जना, जिजाऊंच्या आणि शिवरायांच्या जय जय काराच्या घोषणेने परिसर दणाणून गेला होता. जयंतीनिमित्त शेकडो भक्त पारंपारिक पोशाखात मिरवणुकीत सहभागी झाले होते. तसेच राष्ट्रवादी काँग्रेस पार्टीचे पदाधिकारी, कार्यकर्ते देखील मोठ्या संख्येने अभिवादन करण्यासाठी उपस्थित होते. याप्रसंगी डॉ. योगेश क्षीरसागर यांनी शिवजयंतीनिमित्त सर्व शिवप्रेमींना शुभेच्छा दिल्या. तसेच आज सायंकाळी ०७ वाजता छत्रपती शिवाजी महाराजांच्या पुतळ्यासमोर लाईट, साऊंड शो होणार असून सुप्रसिद्ध मराठी रॅपर मिटोराईट येत आहेत. या सोहळ्याचे बीडकरांनी साक्षीदार व्हावे असे आवाहन डॉ. योगेश शिरसागर यांनी केले आहे. स्वराज्य सप्ताह अंतर्गत छत्रपती शिवजयंती निमित्त छत्रपती शिवाजी महाराज पुतळ्याजवळ (शिवतीर्थ) बाल रूपातील शिवराय वेशभूषा स्पर्धेचे आयोजन करण्यात आले होते. यावेळी अनेक लहान लहान स्पर्धकांनी बाल शिवरायांची वेशभूषा केलेल्या पहावयास मिळाल्या. यावेळी शिवप्रेमींना साक्षात बाल शिवराय बीडच्या शिवतीर्थावर अवतरल्यासारखे चित्र होते.
