आशाताई बच्छाव
परळीत मुलीचा फोटो काढल्याने राडा; लोकमान्य रसवंती गृहातील घटना
मोहन चव्हाण
ब्युरो चिफ बीड जिल्हा
बीड/परळी दि:०९ रोजी शहरातील रसवंतीगृहांमध्ये आलेल्या ग्राहक मुलींचा फोटो व्हिडिओ करण्याच्या कारणावरून नागरिक संतप्त झाले.याच रसवंतीगृहामध्ये काम करणाऱ्या एका युवक कामगाराने या मुलींचा फोटो, व्हिडिओ घेण्याचे गृहणास्पद कृत्य केल्याने मोठा राडा झाल्याचे बघायला मिळाले. दरम्यान शहराचे मध्यवर्ती ठिकाण बाळकृष्ण रोडे चौकात हा प्रकार घडल्याने मोठ्या प्रमाणावर नागरिक व बघ्यांची गर्दी झाली होती.
प्राप्त माहितीनुसार, उपजिल्हा रुग्णालयाजवळ मुख्य रस्त्यावरच असलेल्या लोकमान्य रसवंतीगृहांमध्ये सायंकाळी साडेसात ते आठ वाजण्याच्या दरम्यान दोन मुली रस पिण्यासाठी बसलेल्या असताना याच रसवंतीगृहात काम करणारा एक युवक कामगार वारंवार त्यांच्या टेबल जवळून मोबाईल हातात धरून ये-जा करत होता ही बाब एका मुलीच्या लक्षात आल्याने तिने आपल्या पालकांना ही बाब कळवली.
पालकांनी घटनास्थळी तात्काळ येऊन शहानिशा केली असता या रसवंतीगृहात काम करणाऱ्या कामगाराने मोबाईल मध्ये फोटो व व्हिडिओ शूट केल्याचा प्रकार समोर आल्याने संतप्त नागरिकांनी त्या कामगाराला व रसवंती मालकाला चांगला चोप दिला. या घटनेने नागरिक संतप्त झाल्याने रसवंतीगृहात काही वेळातच मोठा जमाव जमा झाला व काही काळ या ठिकाणी राडा सुरू होता. दरम्यान मध्यवर्ती ठिकाणी हा प्रकार घडल्याने मोठ्या प्रमाणावर नागरिकांची व बघ्यांची गर्दी झाली होती, मोठ्या संख्येने जमाव जमा झाल्याची माहिती मिळताच संभाजीनगर पोलिसांनी घटनास्थळी धाव घेऊन परिस्थिती नियंत्रणात आणली. तसेच या घटनेचा अधिक तपास पोलीस करत आहेत.