आशाताई बच्छाव
४० मुख्याधिकाऱ्यांच्या बदल्या; बीडच्या नीता अंधारे यांच्याही बदलीची चर्चा
मोहन चव्हाण
ब्युरो चिफ बीड जिल्हा
बीड दि ०७ जिल्ह्यातील नगरपालिकांपैकी गेवराई नगरपालिकेचे मुख्याधिकारी भोसले आणि अंबाजोगाई नगरपालिकेचे मुख्याधिकारी डॉक्टर गुट्टे यांची बदली करण्यात आली असून बीड नगर पालिकेच्या मुख्याधिकारी नीता अंधारे यांच्याही बदलीची चर्चा सुरू झाली आहे. लोकसभा निवडणुकीपूर्वी नगरविकास विभागाने राज्यातील ४० मुख्याधिकाऱ्यांच्या बदल्या केल्या आहेत. यात बीड जिल्ह्यातील गेवराई व अंबाजोगाई नगरपालिकेचे अनुक्रमे भोसले आणि गुट्टे यांची बदली झाली असून भोसलेंना चिपळूण नगरपालिका मुख्याधिकारी तर गुट्टेनां उस्मानाबाद येथे सहआयुक्त जिल्हा प्रशासन अधिकारी गट अ या पदावर पदस्थापना देण्यात आली आहे. तर बीड नगर परिषदेत मुख्याधिकारी पदावर आल्यानंतर नीता अंधारे यांनी जेव्हापासून पदभार स्वीकारला तेव्हापासून आत्तापर्यंत शहरातील स्वच्छता, पाणीपुरवठा, विद्युत प्रश्न, रस्ते व नाल्यांचे प्रश्न सातत्याने आहे तसेच पडून आहेत. किंबहुना त्यात वाढ झाली आहे परंतु मुख्याधिकारी म्हणून हे सर्व प्रश्न सोडविण्यात नीता अंधारे ह्या अपयशी ठरल्या आहेत. शिवाय मुख्याधिकाऱ्यांच्या बनावट सह्या व शिक्का तयार करून पालिकेच्या नावाने बनावट गुंठेवारी करून कागदपत्र बनवणारे रॅकेट उघड होऊनही त्यांनी कसलीच कारवाई केली नाही. याशिवाय २२ वर्षापासून कर्तव्यावर असलेले १३५ स्वच्छता कर्मचारी सुद्धा त्यांनी कामावरुन कमी करून टाकले. सर्व बाबी त्यांच्या विरोधात जात असल्याने लवकरच त्यांचीही बदली होईल अशी चर्चा मोठ्या प्रमाणात होऊ लागली आहे.