आशाताई बच्छाव
बिलाखेड येथे बंद घर फोडून 60 हजारांचा ऐवज लंपास
चाळीसगाव प्रतिनिधी विजय पाटील – तालुक्यातील बिलाखेड येथे घर बंद असल्याचा फायदा घेऊन चोरट्यांनी घराचे कुलूप तोडून कपाटातील लॉकरमधून रोख रकमेसह सोन्याचे दागिणे व मोबाईल असा सुमारे 60 हजाराचा ऐवज लंपास केला. दिवाळीनिमीत्त हे कुटुंब मूळ गावी गेले होते. ही संधी साधून चोरट्यांनी घरफोडी केली. तसेच शेजारच्या घरातून मोबाईल देखील चोरून नेला.याप्रकरणी चाळीसगाव शहर पोलीसात चोरीचा गुन्हा दाखल करण्यात आला आहे.
चेतन निंबा चव्हाण रा. उत्कर्ष गोडावूनच्या पाठीमागे, बिलाखेड यांचे बि-बियाणे विक्रीचे दुकान आहे.दि. 8 नोव्हेंबर रोजी ते सकाळी 8 वाजता कुटुंबासह बेलगंगा येथे दिवाळीनिमीत्त आई वडिलांकडे गेले होते.दि.9 रोजी सकाळी 8.30 वाजता ते बिलाखेड येथील घरी आले असता त्यांना घराचा दरवाजा उघडा दिसला व हॉलमधील सामान अस्तव्यस्त दिसले.तर घरातील कपाटातील लॉकरही तुटलेले दिसले.
चोरट्यांनी दि.8 रोजी सकाळी 8 ते दि.9 रोजी सकाळी 8.30 वाजेच्या दरम्यान घराला लावलेले कुलूप तोडून घरात प्रवेश करून कपाटातील लॉकरमध्ये ठेवलेले 48 हजार रूपये किंमतीची सोन्याची पोत, 2 हजार रूपये किमतीच्या दोन नथ, 1 हजार रूपये किंमतीचे ओम पान व रोख 5 हजार रूपये असा 56 हजार रूपयांचा ऐवज लंपास केला. तसेच चव्हाण यांच्या घराशेजारी राहणारे कारभारी ज्ञानदेव सुर्यवंशी यांचा 4 हजार रूपये किंमतीचा मोबाईल चोरून नेला. चोरट्यांनी एकुण 60 हजार रूपयांचा ऐवज चोरून नेला. या प्रकरणी चेतन निंबा चव्हाण यांनी दिलेल्या फिर्यादीवरून चाळीसगाव शहर पोलीस स्टेशनला अज्ञात चोरट्याच्या विरोधात भादंवि कलम454,457,380,379 प्रमाणे गुन्हा दाखल करण्यात आला आहे.
