आशाताई बच्छाव
भाक्षी ग्रामपंचायतीच्या कथित गैरव्यवहाराची विभागीय आयुक्तामार्फत चौकशीची मागणी
भास्कर देवरे (युवा मराठा न्युज):- बागलाण तालुक्यातील भाक्षी ग्रामपंचायतीच्या लाखो रुपयांच्या कथित भ्रष्टाचाराची चौकशी करण्यासाठी नियुक्त केलेल्या चौकशी समितीने तक्रारदारांचे म्हणणे ऐकून न घेता त्यांचीच उलट तपासणी करून त्यांना अपमानास्पद वागणूक दिल्याचा आरोप करत या प्रकरणाची निपक्षपातीपणे चौकशी करावी अशी मागणी विभागीय आयुक्त नाशिक यांच्याकडे निवेदनाद्वारे करण्यात आली आहे.
दरम्यान, या संदर्भात जिल्हा परिषदेच्या मुख्य कार्यकारी अधिकाऱ्यांना अर्जाद्वारे माहिती देऊन एक महिन्यापेक्षा जास्त कालावधी उलटूनही कोणतीही कार्यवाही करण्यात आली नसल्याने सर्वत्र उलट सुलट चर्चा केली जात आहे.
भाक्षी ग्रामपंचायतीच्या सरपंच व ग्रामसेवक यांनी ग्रामपंचायतीच्या विकास कामांच्या निधीत लाखो रुपयांचा भ्रष्टाचार केल्याची तक्रार सामाजिक कार्यकर्ते प्रकाश देवरे, पंकज कापडणीस व गोरख देवरे यांनी दि. ५ व ९ सप्टेंबर २०२२ रोजी जिल्हा परिषदेच्या वरिष्ठ अधिकाऱ्यांकडे केली होती. त्या अनुषंगाने निफाड पंचायत समितीचे गटविकास अधिकारी संदीप कराड, विस्तार अधिकारी सुहास शिंदे व शाखा अभियंता यांची चौकशी करण्यासाठी नियुक्ती केली होती. त्यानुसार 4 नोव्हेंबर रोजी संबंधित चौकशी अधिकाऱ्यांनी ग्रामपंचायतीस भेट दिली व तक्रार कर्त्यांनाही प्रत्यक्ष बोलावून घेतले होते. त्यावेळी माहिती अधिकारात प्राप्त माहितीप्रमाणे दलित वस्ती
सुधार योजनेअंतर्गत रमाई नगर, आंबेडकर नगर व बौद्ध नगर कुठे आहेत याची आपण प्रत्यक्ष पाहणी करावी, भाक्षी गावातील स्मशानभूमीच्या जागेवरील मुरूम चोरीची पाहणी करावी, बेकायदेशीरपणे वितरित केलेल्या ओपन प्लेस ची माहिती जाणून घ्यावी, तसेच निकृष्टपणे केलेल्या इतर कामांची ही प्रत्यक्ष पाहणी करून खात्री करून घ्यावी असे तक्रार कर्त्यांनी यावेळी सांगितले. मात्र समितीतील अधिकाऱ्यांनी काही एक ऐकून न घेता ग्रामसेवकाने आम्हाला माहिती दिलेली आहे आम्ही पाहून घेऊ तुम्ही आता येथून निघून जा असे सांगून तक्रार कर्त्यांना अपमानास्पद वागणूक दिली.
किमान आम्ही केलेल्या तक्रारीनुसार कामांची पाहणी तरी करून घ्या, असेही तक्रार कर्त्यांनी सुचित केले असता, चौकशी कशी करायची हे तुम्ही आम्हाला शिकवू नका, आमच्या पद्धतीने आम्ही चौकशी करू असे उद्धटपणे उत्तर देऊन तक्रार कर्त्यांना अपमानीत केले होते. दरम्यान या पार्श्वभूमीवर तक्रार कर्ते प्रकाश देवरे व इतरांनी विभागीय आयुक्त नाशिक यांचेकडेनिपक्षपातीपणे चौकशी करावी अशी मागणी
केली आहे. यासंदर्भात विभागीय आयुक्तांनी निपक्षपातीपणे चौकशी करून दोषी असणाऱ्यांवर कठोर कारवाई करावी अन्यथा पंचायत समिती कार्यालयासमोर पुनश्च आमरण उपोषण केले जाईल असा इशारा तक्रार कर्त्यांनी दिला आहे.
