शाळा, कॉलेज मध्ये येणाऱ्या जाणाऱ्या मुलींची छेड काढणाऱ्या लफडे बहाद्दरांना आता रट्टे!

आशाताई बच्छाव

शाळा, कॉलेज मध्ये येणाऱ्या जाणाऱ्या मुलींची छेड काढणाऱ्या लफडे बहाद्दरांना आता रट्टे!

खबरदार! महिला, मुलींवर वाईट नजर टाकाल तर…

ज्ञानेश्वर पाटील दांदळे विशेष प्रतिनिधी
(युवा मराठा न्यूज नेटवर्क)

बुलडाणा -: शहर व ग्रामीण भागात शाळेत, कॉलेज मध्ये जाणाऱ्या मुलींकडे काही टवाळखोरांच्या नजरा असतात. मुलींवर वाईट नजर टाकने, त्यांच्यावर कमेंट करने, कधी कधी जबरदस्ती प्रपोझ करने, त्यांची छेड काढणे, मुलींवर अश्लील कॉमेंट करणे असले उद्योग हे लफडेखोर पोट्टे करीत असतात. आता मात्र या लफडे बहादरांना रट्टे देण्याची व्यवस्था पोलीस विभागाकडून करण्यात आली आहे. बुलढाणा पोलीस अधीक्षक अरविंद चावरीया आणि उपविभागीय पोलीस अधिकारी सचिन कदम यांच्या आदेशाने बुलडाणा विभागात दामिनी पथक सक्रिय करण्यात आले असून मुलींसाठी, पालकांसाठी एक मदत क्रमांक सुद्धा जाहीर करण्यात आला आहे. अशा रोमीयोंचा त्रास होत असल्यास “त्या” क्रमांकावर फोन केल्यास तात्काळ पोलिसांची मदत उपलब्ध होणार आहे. या दामिनी पथकात ३ महिला अंमलदार व २ पुरुष अंमलदारांचा समावेश आहे. चिखली, बुलडाणा शहर , बुलडाणा ग्रामीण, बोराखेडी, धाड अमडापूर पोलीस स्टेशन अंतर्गत येणाऱ्या परिसरात हे पथक कार्यरत असणार आहे.
दामिनी पथकाने त्यांच्या कामाला सुरुवात केली आहे. श्री, संत गजानन महाराज कॉलेज ऑफ फार्मसी सागवन, राजेंद्र गोडे कॉलेज ऑफ फार्मसी सागवन, अनुराधा कॉलेज चिखली,जवाहर उर्दू हायस्कूल मोताळा, राजमाता जिजाऊ मुलींची सैनिकी शाळा चिखली, शिवाजी सायन्स अँड आर्ट कॉलेज चिखली, जिजामाता महाविद्यालय बुलडाणा, भारत विद्यालय बुलडाणा, एडेड हायस्कूल बुलडाणा यासारख्या शाळा कॉलेज मध्ये दामिनी पथकाने भेटी दिल्या आहेत. दामिनी पथकाबद्दल विद्यार्थी, विद्यार्थिना माहिती देण्यात आली असून शाळा ,कॉलेज मध्ये विद्यार्थिनींसाठी तक्रार पेटी लावण्याच्या सूचना प्राचार्यांना देण्यात आल्या आहेत.
बुलडाणा केसापुर एसटी बसमध्ये ७ ऑक्टोबर रोजी मुलींशी टवाळखोर वागणाऱ्या तीन टवाळखोरांना सुद्धा दामिनी पथकाने आपला हिसका दाखवला. शहर व ग्रामीण भागातील शाळा ,कॉलेज परिसर, बसस्थानक परिसर, शिकवणी वर्गाचा परिसर या ठिकाणी दामिनी पथकाने पेट्रोलिंग सुरू केले आहे. महिला, मुलींना अशी कोणतीही अडचण आल्यास 9067286510 या क्रमांकावर संपर्क करण्याचे आवाहन करण्यात आले आहे. याशिवाय 112 व महिला हेल्पलाईन क्रमांक 1091 या क्रमांकावर सुद्धा संपर्क साधता येईल.