आशाताई बच्छाव
भोकर तालुक्यातील पाळज शिवारात वीज पडून तीन शेत मजुराचा मृत्यू परिसरात सर्वत्र हळहळ.
नांदेड जिल्हा ब्युरो चीफ मनोज बिरादार (युवा मराठा न्यूज नेटवर्क)
भोकर तालुक्यातील पाळज येथे अचानक आलेल्या वादळी वारे आणि विजांच्या कडकडाटासह पाळज शिवारात मंगळवारी दुपारी चार ते पाच वाजेच्या दरम्यान पाऊस सुरू झाला होता. यात पाळज शिवारात गावातील मजूर सोयाबीन पेरणी चे काम करीत असताना अचानक विजेच्या कडकडाटासह पाण्याचे सरी येत असल्याने पाण्यापासून आपले संरक्षण करण्यासाठी या तीनही शेतमजुरांनी शेतातील झाडाचा आसरा घेतला. परंतु त्यातच काम करणाऱ्या मजुरावर काळाने घाला घातला. वीज पडून तीनही मजूर जागच्या जागी ठार झाले. भोकर तालुक्यातील पाळज येथील रहिवासी साईनाथ सातमवार वय ३० वर्ष, राजेश चटलावार वय ४० वर्ष, बोजन्ना रामनवार वय ३२ वर्षे असे तीन शेत मजूर जागीच ठार झाले. घटनेची माहिती मिळताच भोकर चे तहसीलदार राजेश लांडगे व त्यांचे पथक पोलीस निरीक्षक विकास पाटील व त्यांची टीम यासह गावातील पोलीस पाटील सरपंच, शेतकऱ्यांनी घटनास्थळी धाव घेतली. सध्या तिन्ही मृतदेह पोलिसांनी ताब्यात घेऊन शवविच्छेदनासाठी भोकर रुग्णालयात पाठविले आहे. या तीनही शेतमजुरावर वीज पडल्याने गावावर शोककळा पसरली आहे.
