राजेंद्र पाटील राऊत
‘ओ शेठ…’ गाण्यातून वेधले खड्ड्यांकडे लक्ष
ठाणे: (अंकुश नारायण पवार, ठाणे शहर प्रतिनिधी, युवा मराठा न्यूज नेटवर्क)
बदलापुरातील उड्डाणपुलाच्या दुरवस्थेबद्दल सोशल मीडियाच्या माध्यमातून उपरोधिक पोस्ट करून नागरिक संताप व्यक्त करीत आहेत. असे असताना आता राष्ट्रवादीने मोबाइलवर ‘ओ शेठ… तुम्ही नादच केलाय थेट’ हे गाणे वाजवून, तसेच बॅनर झळकवून नगर अभियंत्यांचे खड्डेमय रस्त्याबद्दल उपरोधिकपणे जाहीर अभिनंदन करीत अनोखे आंदोलन केले.
राष्ट्रवादीचे जिल्हा उपाध्यक्ष अविनाश देशमुख यांच्या नेतृत्वाखाली कुळगाव-बदलापूर नगर परिषदेच्या प्रवेशद्वारावर हे आंदोलन करण्यात आले. आंदोलकांनी मुख्याधिकारी योगेश गोडसे यांची भेट घेऊन निवेदनही सादर केले.
आंदाेलकांना अटक व सुटका
अविनाश देशमुख यांच्यासह आंदोलन करणाऱ्या राष्ट्रवादीच्या पदाधिकाऱ्यांना बदलापूर पूर्व पोलिसांनी अटक करून नंतर त्यांची सुटका केली. या आंदोलनात विद्यार्थी संघटनेचे जिल्हाध्यक्ष नरेश गायकवाड, डॉक्टर सेलचे जिल्हा सरचिटणीस डॉ. अमित गोइलकर, ओबीसी विभाग जिल्हाध्यक्ष संजय कराळे, प्रीतम वानखडे, शंकर चौरे, अरबाज कुरेशी, सिद्धार्थ अंगुरे आदी सहभागी झाले होते.
——————–
