तलावावर बैल धुण्यासाठी गेलेल्या तरुणाला जलसमाधी!; खामगाव तालुक्यातील घटना
बूलडाणा :-ब्यूरो चीफ स्वप्निल देशमुख यूवा मराठा न्यूज नेटवर्क
पोळा सणानिमित्त बैलांना
धुण्यासाठी तलावावर गेलेल्या तरुणाचा पाण्यात बुडून मृत्यू झाला. ही घटना आज, ५ सप्टेंबर रोजी बोरी आडगाव (ता. खामगाव) येथे सकाळी १० वाजता घडली. आशुतोष निरंजन सुरवाडे (२२, रा. बोरी आडगाव, ता. खामगाव) असे तलावात बुडून मृत्यू झालेल्या तरुणाचे नाव आहे.
पोळा सणाच्या आदल्या दिवशी बैल धुण्याची परंपरा आहे. आज आशुतोष बैल धुण्यासाठी तलावावर गेला होता. तलावात उतरल्यानंतर पाण्याचा अंदाज न आल्याने तो बुडाला. सोबत असलेल्या नागरिकांना ही बाब लक्षात येताच त्याला पाण्याच्या बाहेर काढण्यात आले. मात्र तोपर्यंत त्याचा मृत्यू झाला होता. आशुतोष बोरी आडगाव येथील माजी सरपंच निरंजन सुरवाडे यांचा मोठा मुलगा होता. त्याच्या पश्चात आई, वडील व लहान भाऊ असा परिवार आहे.