विजेचा शॉक लागून वाटेगावातील पैलवानाचा मृत्यू
कोल्हापूर : वाटेगाव ता. वाळवा येथील सुकुमार संभाजी जाधव (वय २२) या नामांकित पैलवानाचा विजेचा शॉक लागून दुर्दैवी मृत्यू झाला. या घटनेने वाटेगाव परिसरात व कुस्ती क्षेत्रात शोककळा पसरली आहे.
याबाबत मिळालेली माहिती अशी की, गुरुवार दि. २० मे रोजी दुपारी तीन वाजण्याच्या सुमारास लटके मळा येथे सुकुमार शेतात गेला होता. शेतात पोल्ट्री शेडचे काम सुरू होते. त्यासाठी लागणारा लोखंडी अँगल उभा करताना अँगलचा धक्का बाजूनेच गेलेल्या ११ केवी च्या विजेच्या तारेला लागला. अन सुकुमारला जोराचा शॉक बसल्याने तो जमिनीवर कोसळला. परिसरातील नागरिकांनी सुकुमारला ताबडतोब कराड येथील सह्याद्री हॉस्पिटल येथे उपचारासाठी दाखल केले. मात्र त्याची तपासणी करून वैद्यकीय सूत्रांनी तो मृत झाल्याचे घोषित केले.
